СҮБЭҺИТ: Хайдах үчүгэй арассааданы көрөн атыылаһабыт?

Төһө даҕаны уопуттаах оҕуруотчут буолбуккут үрдүнэн, үчүгэй арассааданы үүннэрэр кыаллыбат түгэннэрэ эмиэ бааллар. Онон ырыынакка эбэтэр илииттэн атыылаһарбытыгар тиийэбит. Оччотугар атыылаһар түгэммитигэр олордор үүнээйибит арассаадатын талыыга олус эппиэтинэстээхтик сыһыаннаһыахха наада. Бүгүн эспиэрдэр арассаада атыылаһыыга сүбэлэрин кытта үллэстэбит.

Арассаада атыылаһыыга туохха болҕомто ууруллуохтааҕый?

Арассааданы үксүн ырыынакка туспа иһиттэргэ (ыстакаанчыкка, горсуокка) атыылыыллар эбэтэр уопсай иһиккэ үүнэриллибити арааран биэрэллэр.

Биэрэһи, оҕурсууну эбэтэр баклажаны туспа иһиттэргэ биирдиилээн үүннэриллибити атыылаһар ордук. Маннык түгэҥҥэ үүнээйини көһөрүүгэ силиһэ буортуламмат. Үүнээйи кытаанах умнастаах, күөх сэбирдэхтээх уонна алдьаныыта суох буолуохтаах. Бээтинэлээх, саһарбыт сэбирдэхтээх үүнээйи ыарытыйбытын эбэтэр иҥэмтэлээх эттиктэрэ итэҕэһин туоһулуур. Маннык арассааданы атыыласпаккыт ордук.

Томат, помидор сэбирдэҕэ күн уотугар, тыалга сымнаабыт түгэнигэр аһаҕас буортан тэпилииссэ иһиттэн ылыллыбыта көрдөрөр. Маннык арассааданы эмиэ атыылаһымаҥ, үүнээйи түргэнник өлөр эбэтэр буорга олордууга өр кэм устата ыарытыйар. Оттон чээлэй күөх сэбирдэхтээх, кытаанах, суон умнастаах үүнээйилэр үксүн азоттаах уоҕурдуунан элбэхтик аһатыллыбытын туоһулууллар. Маннык үүнээйи түргэнник улаатар эрээри, сибэккилэнэрэ уонна ас биэрэрэ бытаарар дииллэр.

Манна биири бэлиэтиир наадалаах — үчүгэй арассаада үүннээйитэ ортотунан 6-8 сэбирдэхтээх буолуохтаах, мантан элбэх буолар түгэнигэр буорга олорбут арассаада эмиэ уһуннук ыарытыйыан сөп.