СҮБЭҺИТ: Хаппыт килиэби быраҕымаҥ!

Уопуттаах оҕуруотчуттар хаппыт килиэби бырахпакка, үүнээйигэ эбии аһылык быһыытынан туттарга сүбэлииллэр. Кинилэр этэллэринэн, үүнээйигэ (оҕурсууга, помидорга) анаан маннык уоҕурдууну оҥорор олус чэпчэки.

Үс лиитэрэлээх бааҥка үс гыммыт биирин хаппыт килиэбинэн толорон баран, үрдүгэр уу кутабыт. Икки-үс күн устата көөнньөрө ууруҥ. Онтон бу көөнньөһүгү 1:10 кээмэйинэн ууга суурайан, икки нэдиэлэҕэ биирдэ ууну кутарга туттуҥ.

Бу килиэп көөнньөһүгэ туһалаах элэмиэннэринэн, үүнүүнү түргэтэтэр  уонна доруоһанан олус баай. Суурадаһын үүнээйи аһылык биэриитин тупсарар, силиһин-мутугун бөҕөргөтөр уонна хас да күн иһинэн биллэр туһаны аҕалар – помидор уонна оҕурсуу умнаһа бөҕөргүүр, чэгиэн туруктанар. Сылаас кэмҥэ бу эбии аһатыыны систиэмэлээхтик туттуҥ. Аскыт-үөлгүт бөдөҥ уонна минньигэс буолуоҕа, диэн «Огород без хлопот» ТГ-ханаал суруйар.

Бу сүбэни туттарга өссө хас да бэлиэтээһини билэр туһалаах:

1. Ханнык килиэп ордугуй? Ордук  хара килиэп хаппытын туһанарга  табыгастаах. Онно доруоһа уонна туһалаах эттиктэр элбэхтэр. Маҥан килиэби эмиэ туттуохха сөп.

2. Сэрэхтээх буолуҥ: кумаарга! Түүнүгүрбүт килиэби туһанымаҥ! Оннук килиэп үүнээйигэ да, буорга да буортулаах буолуон сөп.

3. Өссө ханнык үүнээйилэри аһатыахха сөбүй? Бу көөнньөһүк помидор уонна оҕурсуу эрэ буолбакка, биэрэскэ, баклажаҥҥа, кабачоктарга уонна дьэдьэҥҥэ эмиэ олус туһалаах.

4. Ханнык үүнээйилэргэ сэрэнэн туттабыт? Сир анныгар үүнэр астаах үүнээйилэргэ (хортуопуй, луук, чосуонук) доруоһалаах көөнньөһүк туһаныллыбат, тэллэй ыарыыларын көбүтүөн сөп, онон кинилэргэ туттубат ордук.

5. Көөнньөһүгү өссө тупсарыахха сөп. Көөнньөһүк түргэнни суурадайарыгар, килиэпкэ кыратык эргэ барыанньаны эбэтэр саахары кутуохха сөп. Оттон бэлэм буолбут көөнньөһүккэ кыратык мас күлүн эбиэххэ, үүнээйини калийынан эбии байытыахха наада

6. Ханнык кэмҥэ кутар ордугуй? Бу эбии аһылыгы үүнээйи сибэккилэнэр уонна астанар кэмигэр кутар ордук. Саҥа тахсан эрэр, мөлтөх арассаадаҕа кутартан туттунуҥ, аһара күүстээх буолуон сөп.