СҮБЭҺИТ: Иннокентий Тарбахов ырысыабынан көбүөр

«Тыгын Дархан» эрэстэрээн пресс-сулууспата Арассыыйа Федерациятын үтүөлээх маастар-повара, саха төрүт аһын биллибит маастара, чаҕылхай шеф-повар Иннокентий Тарбахов ырысыаптарынан үллэстэрин салгыыр.

Бүгүн Үрүҥ Тунах Ыһыахтарынан минньигэс көбүөрү астыаҕыҥ.

Туох наада буоларый: Ынах арыыта – 0,5 кг, үүт – 0,5 кг. Тахсыыта — быһа холоон 1 кг көбүөр.

Көбүөрү астыыбыт: Бу аһы астыырга муостан оҥоһуллубут ытыгы туһанар ордук. Маннык ытык икки өттүгэр иккилии үүттээх, ол эбэтэр түөрт үүттээх буолар. Аныгы кириэстии оҥоһуулаах мас ытыгы эмиэ туһаныахха сөп. Эмалированнай бидону эбэтэр үрдүк көстүрүүлэни ылабыт. Тымныы уонна итии үүккэ анаан икки кытыйаны бэлэмниэххэ наада. Бидоҥҥа сымнатыллыбыт ынах арыытын кутаты, ол кэннэ кыратык сылаас үүтү кутан баран, тэҥҥэ ытыйабыт.

Хардарыты таары тымныы уонна итии үүтү эбэн биэрэбит. Итии үүт арыыны убатар, оттон ууллан хаалбатын диэн тымныы үүтү кутабыт– ытыйар кэмҥэ температуратын көрө итинник астыыллар.

Сөптөөх температура тутуһулуннаҕына, көбүөрбүт сымнаҕас, көрүҥэ килбэчигэс буолан тахсар. Көбүөрү үксүн сылаастыы лэппиэскэни кытта уураллар. Ордук элбэх маассаны сойбут лэппиэскэ кыра кырбастарыгар булкуйаллар. Сылаастыы сииргэ ордук минньигэс, ол эрээри сойбута эмиэ бэртээхэй. Ону таһынан, ханнык баҕарар барыанньаны эбиэххэ сөп. Минньигэстик аһааҥ!

Санатан эттэххэ, Иннокентий Тарбахов бэйэтин уһун карьератын тухары саха аһын үгэстэрин, сиэрин-туомун харыстыырга уонна кэнчээри ыччакка тиэрдэргэ анаабыта. Кини Тарбахов оскуолатын тэрийбитэ, сэминээрдэри ыыппыта уонна «Тарбаховтыын астыахха» диэн ааптарскай тэлэбиидьэнньэ биэриитин ыыппыта.