СҮБЭҺИТ: Киэһээҥҥи аһылыкка кабачоктан судургу ырысыап….

Кабачок саҕа түргэнник үүнэр, олус битэмииннээх оҕуруот аһа суоҕун кэриэтэ. Биһиги эһиэхэ кабачоктан барыанньа, лечо араас ырысыабын сырдаппыт буоллахпытына, бүгүн кабачоктан «чыычаах уйата» диэн киэһээҥҥи аһылыгы солбуйар судургу уонна түргэн аһылыгы билиһиннэриэхпит.

Эйиэхэ наада:

• Икки устуука кабачок;
• Икки моркуоп;
• Түөрт сиикэй хортуоппуй;
• Төгүрүк луук;
• Икки сымыыт;
• Бурдук;
• Теркаламмыт сыыр;
• Черри помидор.

Кабачокпутун, моркуоппутун, хортуоппуйбутун хастаан баран, уһун синньигэс сурааһын быһыылаах гына теркалыыбыт. Теркаламмыт оҕуруот астары уонча мүнүүтэ сытыара түһэн, уутун таһаарабыт. Ыгабыт, туус кутабыт, петрушка, укроп эбиэххэ сөп. Икки сымыыты кутабыт, ыстакаан аҥаара бурдугу кутабыт уонна кэтилиэт курдук быһыылаан духуопка илииһигэр уурабыт. Чыычаах уйатын курдук оҥорон баран, теркаламмыт сыыры кутабыт, ол үрдүгэр черри помидордары уурталыыбыт. Биир уонча кэтилиэт тахсыахтаах. 180 кыраадыс итиигэ духуопкаҕа уган буһарабыт.