Сүбэһит: Куурусса этиттэн черносливтаах рулет

Саҥа дьыллааҕы сандалыга өссө биир судургу эрээри, минньигэс, тотоойу сокууска ырыссыабын таһаарабыт.

Куурусса этин синньигэс гына тэниччи быһан баран, кэмбиэр курдук тэнитэбит. Хайдах быһары билбэт буоллахха, интэриниэккэ көрүөххэ сөп. Тиистээх мас өтүйэнэн охсуолаан биэрдэххэ, өссө сымныыр. Туустуубут, биэрэстиибит. Сууйуллубут черносливы, бытарытыллыбыт грецкэй эриэхэни куурусса этин үрдүгэр уурабыт. Рулет курдук эрийэбит.

Рулеты пергамент кумааҕыга, эбэтэр, фольгаҕа суулаан баран, икки кытыытын кэмпиэт курдук баайабыт. Онтон оргуйа турар ууга 5 мүнүүтэ буһарабыт. Буһа турдаҕына, эргитиэххэ сөп. Куурусса рулетын буспут уутугар 30 мүнүүтэҕэ хаалларабыт. Оччоҕо этэ куурбат-хаппат, сүмэһиннээх буолар. Духуопкаҕа да буһарыахха сөп.

Ууттан таһааран, сойутан баран, рулеты быһан, күөх отунан киэргэтэн, бырааһынньыктааҕы сандалыбытыгар уурабыт. Чернослив ураты амтаны биэрэр, куурусса этин амтанын байытар. Элбэх белоктаах, битэмииннээх, диетаҕа табыгастаах, доруобуйаҕа туһалаах ас буолар.