СҮБЭҺИТ: Куурусса түөһүттэн буженина

«Вкусная шкатулка рецептов» ВКонтакте бөлөх ааптара, өрөспүүбүлүкэ биллиилээх фуд-блогера Ирина Дегтярева куурусса түөһүттэн буженина  ырысыабын кытта үллэһиннэ.

Эһиэхэ наада буолар:  Куурусса түөһэ (уҥуоҕа суоҕа ордук), туус, биэрэс, паприка, куурусса этигэр аналлаах тума, чосунуок, икки ост.ньуоска мас арыыта, соевай соус.

Куурусса түөһүн тумаларынан үчүгэйдик сотобут, мас арыынан биһэбит уонна үрдүгэр соевай соуһу кутабыт. 2-3 чаас устата маринуйдуу уурабыт. Онтон кууруссаны фольгаҕа угабыт, үчүгэйдик суулуубут (икки хос) уонна 190 кыраадыска 30-35 мүнүүтэҕэ духуопкаҕа буһара уурабыт. Буһуон 10 мүнүүтэ иннинэ фольганы арыый арыйан биэриэххэ наада. Буженинаны фольгата суох эмиэ буһарыахха сөп. Иһиккэ сойута хаалларабыт. Буженина олус сымнаҕас, сүмэһиннээх, минньигэс уонна үчүгэй сыттаах буолан тахсар. Боруобалаан көрүҥ!