СҮБЭҺИТ: Кыбартыыраҕын атыылаатаххына…

Билигин хаһааҥҥытааҕар даҕаны хамсаабат баайы-дуолу – дьиэни үгүс киһи атыылыыр. Ол эрээри кыбартыырабын атыылаатым диэн баран уоскуйбат эбиккин.

Тоҕо диэтэххэ, эйиэхэ уонча да сыл буолан баран маннык төлөбүргүн төлүү иликкин диэн кумааҕы кэлиэн сөп. Холобура, гааска тэхиньиичэскэй хааччыйыыга. Биллэн турар, атыылаабыта ырааппыт дьиэтигэр итинник кумааҕыны туппут киһи бастаан соһуйуоҕа. “Хайа, атыылыырбар риэлтордарга иэһим-күүһүм суоҕун туһунан ыспыраапкалары хомуйан туттарбытым”, — диэн сөп.

Ол эрээри дьиэтин, кыбартыыратын атыылыыр киһи хайаан даҕаны уот, гаас төлөбүрдэринэн сибээстээн, учуоттан уһуллуохтаах эбит. Уһулла иликтэр, холобура, гааһы төлүүр тэрилтэҕитигэр тиийэн  тустаах аадырыстан учуоттан уһуллар туһугар сайабылыанньа суруйуохтаахтар. Ону тэҥэ дьиэҕин атыылаабытын туһунан атыылаһыы-атыылааһын дуогабарын илдьэҕит. Пааспардаах тиийиэхтээххит.

Тускутугар туһаныҥ.