СҮБЭҺИТ: күлүмэнтэн көмүскэнэр ньымалар

Күлүмэн быйыл наһаалаата! Биир күлүмэн ыстыыра 70 кумаарга тэҥнэһэр. Дьиэ кыылларын, сүөһүлэри олус эрэйдиир үөннэр. Ол да иһин сылгыларбыт, ынахтарбыт кинилэртэн көмүскэнээри бөһүөлэктэн арахпаттар.

Бүгүн куйаар ситимиттэн  күлүмэнтэн көмүскэнэр ньымалары сырдатабыт. Аныгылыы эттэххэ — туһалаах лайфхактары — тускар туһан!

Тиэргэҥҥэ харыстанар сүбэлэр

⁃ Тиэргэҥҥит отун-маһын, талахтарын суох гына сатааҥ. Күлүмэннэр ордук окко саһан төрүүллэр-ууһууллар.

⁃ Аһаҕас уулары олус сөбүлүүллэр. Онон бассейн, буочука хаппахтанара ордук.

⁃ Куурусса, сибиинньэ уйатын, аһыыр сирдэрин ыраастыы сылдьыҥ. Сыкка-сымарга түргэнник мусталлар.

⁃ Туалет, хотон турар сирдэрин эмиэ ыраастыыр ордук.

Тугунан эмтиибит? Дихлофос, карбофос, хлорофос, гехсахлоран, метоксихлор курдук сириэстибэлэр күлүмэннэри уонна личинкаларын суох гыналлар.

Ол эрэн, бу киһи доруобуйатыгар кутталлааҕын өйдөөн, тустаах тэрилтэлэри ыҥыран эмтэтэр ордук. Эбэтэр олох сэрэхтээхтик туттаргытыгар сүбэлиибит.

Лайфхак

• Чэпчэки ыйааһыннаах мээчиккэ сыстар скотчу дуу, лиэнтэни дуу эрийдэххитинэ күлүмэннэр онно сыстыахтара. Дьиэҕит, күүлэҕит таһыгар үөһэ баайыҥ.
• Сахсырҕаҕа аналлаах сыстар лиэнтэлэри күүлэҕит, мансардаҕыт, беседкаҕыт тула сыһыардаххытына эмиэ олус туһалаах.
• Онтон хаһаайыстыбалаах дьоҥҥо сүөһүлэргитин дегтярнай уунан ыстараргытыгар, арыынан соторгутугар сүбэлиибит.

Күлүмэннэр итиигэ, куйааска ордук кэлэллэрин өйдөөн көрбүккүт буолуо. Массыынанан айаннаан истэххинэ чопчу көрбүтүнэн кэлэллэр. Аллараа кыайан көппөт үөннэр.

Куйаар ситимигэр туох суоҕуй? Барытын булаҕын. Бу киһи бэйэтэ оҥорор күлүмэнтэн харыстанар малы эмиэ боруобалаан көрүөххүтүн сөп.

Маны күн уотугар туруордахха олус туһалаах дииллэр. Кылгас сайыммытын үөрэ-көтө, сынньалаҥнык атаарыахха. Бу кылгас сүбэлэри тускутугар туһаныҥ!