СҮБЭҺИТ: Маҕаһыынтан атыыласпакка минньигэс сыыры хайдах оҥоробутуй?

Билиҥҥи кэмҥэ маҕаһыыҥҥа табаар арааһа дэлэй, ол эрээри дьиэҕэ бэйэ илиитинэн оҥоһуллубут ас ордук минньигэс уонна туһалаах буолар. Бүгүн биһиги ааҕааччыларбытыгар дьиэ усулуобуйатыгар, элбэх эрэйэ суох, боростуой сыыры хайдах бэлэмниир туһунан кэпсиэхпит.

Бу ньыма саҥа саҕалыыр хаһаайкаларга да, уопуттаахтарга да барсыа. Элбэх бириэмэни эрэйбэт, бородууктата да чэпчэки.

Биһиэхэ туох наада буолуой?

• Үүт (үрдүк сыалаах, 3,2%-тан үөһэ үүт ордук) – 1 лиитирэ;
• Сымыыт – 3 устуука;
• Туус – 1 кыра ньуоска (бэйэҕит талбыккытынан эбиэххитин сөп);
• Сүөгэй (20% сыалаах) – 200 грамм.

Оҥорор ньыма

1. Бэлэмнэнии. Дириҥ иһиккэ сымыыттары, сүөгэйи уонна тууһу булкуйуҥ. Биир маасса буолуор диэри үчүгэйдик ытыйыҥ (миксэринэн буолбатах, илиинэн).

2. Үүтү сылытыы. Көстүрүүлэҥэ үүккүтүн кутан баран, орто уокка туруоруҥ. Оргуйан эрэрин кэтэһиҥ, ол гынан баран букатын оргутумаҥ. Үүт кытыытыгар кыра хабахтар үөскээн эрдэхтэринэ сөп буолар.

3. Маассалары холбооһун. Үүккүт итийдэҕинэ, уоту саамай мөлтөххө туруоран, урут бэлэмнээбит сымыыттаах-сүөгэйдээх маассаҕытын чараас сүүрээнинэн, тохтоло суох булкуйа-булкуйа, үүккэ кутуҥ.

4. Сүрүн түгэн. Булкуйаргытын тохтотумаҥ. Сотору кэминэн үүккүт туораахтыйан, хойдон, сыыр маассата уонна саһархай уу тус-туспа арахсан барыахтара. Бу үксүн 5-7 мүнүүтэни ылар. Уута ыраастыйан көһүннэҕинэ, көстүрүүлэни уоттан ылыҥ.

5. Сиидэлээһин. Икки-үс хаттыгас маарыланы сиидэҕэ тэлгээн баран, көстүрүүлэҕэ сэрэнэн кутуҥ. Уута барыта сүүрэн бүтүөр диэри кэтэһиҥ (хаалбыт ууну алаадьыга эҥин туһаныахха сөп, тоҕумаҥ).

6. Формаҕа угуу. Маарыла иһигэр хаалбыт иэдьэгэйи кытаанах гына баайан, мөһөөччүк курдук оҥоруҥ. Үрдүгэр ыарахан эттиги (холобур, уулаах бааҥканы) ууран, пресс анныгар 1-2 чаас хаалларыҥ. Өскөтүн өссө кытаанах буоларын баҕардаххытына – 4-5 чаас туруоруохха сөп.

7. Түмүк. Бэлэм буолбут сыыры сэрэнэн маарылаттан таһааран, халадьыылыньыкка чаас устата уган сойутуҥ.

Сүбэлэр:  Минньигэс амтаҥҥа сыырга кураанах укуруоп, петрушка эбэтэр чосунуок эбиэххитин сөп.  Бутербродка, салаакка эбэтэр туспа да сииргэ олус табыгастаах. Маннык боростуой ньыманан бэйэҕит дьиэ кэргэҥҥитин уонна чугас дьоҥҥутун натуральнай, минньигэс аһынан үөрдүөххүтүн сөп. Аскыт тотоойу буоллун!