Сүбэһит

Сүбэһит: Масленицаҕа «Оруоса» туорду астааҥ

16.02.2026, 19:30

Хаартыска: Гастроном.ру

Бөлөххө киир:

Бүгүҥҥүттэн православнай христианнарга Улуу пост иннинээҕи бырааһынньык — Масленица саҕаланна. Саха дьоно төһө да бары үгэһи тутуспаталлар, хас ыал аайы билигин хаһаайкалар минньигэс билиинчик буһарар буолуохтаахтар. Ураты соҕус көстүүлээх билиинчиги буһаран, чугас дьоҥҥутуттан хайҕаныаххытын сөп.

«Оруоса» туорт

Тиэстэтэ: 200 г бурдук, 500 мл үүт, 450 г биэ эмиийэ тоҥ отон, 50 г ынах арыыта, 2 уст. сымыыт, 50 мл үүнээйи арыыта, 3 ост.нь. саахар, туус, кыһыл өҥнөөх ас кырааската, саахар пуударата.

Кириэмэ: 0,5 кг иэдьэгэй сыыра (сыр творожный), 150 мл 33%-наах чөчөгөй, 100 г саахар пуударата, 2 г ванилин.

Үүтү сымыыты кытта булкуйан баран, бурдугу, саахары, тууһу, ас кырааскатын кутан, үчүгэйдик булкуйабыт. Кыһыл кыраасканы куппатахха, көннөрү билиинчик туорду эмиэ оҥоруохха сөп. Салгыы ынах арыытын уулларан баран, үүнээйи арыытын кытта тиэстэҕэ кутабыт, булкуйабыт.

Биэ эмиийин тоҥнуу ылан, 100 мл ууну эбэн баран, оргутабыт, сиидэлиибит. Бу пюре аҥаарын тиэстэҕэ эбэн, булкуйан баран, 15-20 мүнүүтэ туруора түһэбит. Чараас билиинчиктэри буһарабыт. Кыһыл өҥнөөх буолан тахсыахтара.

Кириэмигэр иэдьэгэй сыырын, чөчөгөйү уонна саахар пуударатын, ванилины булкуйан, күүстээх миксеринэн эрийтэрэн, көбүтэбит. Үллүбүтүн кэннэ, хаалбыт пюрены кутабыт, эмиэ эрийтэрэбит.

Хас биирдии билиинчиги 2-3 ост.нь. кириэминэн сотобут, икки кытыытын биспэппит. Кириэминэн сотуллубатах икки өттүн үөһэ тутан, бүк тутабыт. Бу кэнниттэн бүк тутуллубут өттүн аллараа, кириэмэ суох өттүн үөһэ тутан, эрийэн, оруоса сибэкки курдук быһыылыыбыт. Билиинчиктэри оруоса сибэкки эминньэхтэрин курдук оҥорон, эрийэн иһэбит. Аллараа өттүнэн кириэминэн биһэн, сыһыаран биэриэххэ сөп.

Үөһээ өттүн сибиэһэй отонунан, саахар пуударатынан уонна аска туттуллар чөмчүүктэринэн киэргэтэн баран, халадыынньыкка 30 мүнүүтэ уган, туруора түһэбит.

Бу билиинчиктэн оҥоһуллар, кыраһыабай, минньигэс, ханнык баҕарар остуолу киэргэтэр бүлүүдэ. Кириэмин аҕыйата түһүөххэ сөп.

«Куруһуба» билиинчик

Судургутук оҥоһуллар эрээри, олус кэрэ көстүүлээх билиинчиги буһаран, дьиэ кэргэҥҥитин, доҕотторгутун күндүлээҥ.

«Роса» бытыылкатыгар 0,5 киилэ үүтү, 2 сымыыты, ч.нь. тууһу, 2 ост.нь. саахары, 2 ост.нь үүнээйи арыытын, 1 ыстакаан бурдугу булкуйуҥ. Тиэстэ сынньылыйа сылдьар, алаадьы тиэстэтиттэн эрэ убаҕас буолуохтаах. Бытыылканы сахсыйан, дэлби булкуйуҥ. Уонча мүнүүтэ туруора түһүөххэ сөп, оччоҕо бурдук крахмала сыстыһан, ордук үллэр.

Бытыылка төбөтүгэр кыра дьөлөҕөстөөн баран, онон кутан, хобордооххо араас куруһуба курдук ойуулаан, араас быһыылаан, билиинчик буһарабыт. Кылаабынайа, тиэстэ кытыытынан төгүрүччү холбоһуохтаах, быстыа суохтаах.

Минньигэстик аһааҥ!

Сүбэһит: Масленицаҕа «Оруоса» туорду астааҥ

Сообщить об опечатке

Текст, который будет отправлен нашим редакторам: