СҮБЭҺИТ: Моркуобу тугунан уонна хаһан аһатабыт

Эргиччи туһалаах моркуобу үүннэрии үгүс сыраны-сылбаны, уопуту эрэйэр. Онон бүгүн уопуттаах оҕуруотчуттар сүбэлэрин, дьоҕус кистэлэҥнэрин кытта үллэстэбит.

Cииктээх буорга ыһыллыбыт моркуоп сиэмэтэ түргэнник быгар. Онон олордуох иннинэ буорун сиигин көрөр булгуччулаах. Сиэмэни 2-3 см дириҥ буорга ыһыллар. Моркуобу кирээдэлэргэ биир тэҥник, арытын көрөн, олус хойуу гына ыспакка олордуллар.

Моркуоп сиэмэтэ төһө түргэнник тыллара буор сиигиттэн уонна халлаан сылааһыттан улахан тутулуктаах. Холобур, +10 кыраадыс сылааска бастакы үнүгэстэр 25-30 күнүнэн биирдэ быгыахтара, оттон +20 кыраадыс итиигэ, биллэн турар, уонча күнүнэн тахсыахтара.

Үүнээйи халыччы ууну сөбүлээбэт — кыра  сииктээх буоларын хааччыйыллыахтаах.

Моркуоп 2-3 сэбирдэҕэ таҕыстаҕына, бу кэмҥэ ордук азот уоҕурдуутугар наадыйар. Оттон сөрүүн халлаан буолар түгэнигэр, аммиактаах суурадаһыны оҥорон кутуллуохтаах — 10 лиитирэ ууга быһа холоон 15-20 г аммиактаах уоҕурдуу суурадаһына оҥоһуллар.

Иккис аһатыытытын  икки нэдиэлэ ааспытын кэннэ оҥорор ордук. Манна калий уоҕурдуута барсар. Бу уоҕурдууну эмиэ ууга суурайан кутабыт. 20-30 г уоҕурдууну 10 лиитирэ сылаас ууга суурайабыт. Фосфорынан аһатыллыбыт моркуоп  минньийэр уонна сүмэһиннээх буолар. Ону таһынан кыһын устата өр кэм устата харайарга көмөлүүр.

Сорох оҕуруотчуттар үлүһүйэн күл кутар идэлээхтэр. Моркуоп күлү сөбүлээбэт. Күлгэ элбэх калийдаах, оттон фосфора суоҕун кэриэтэ. Аны туран, сорох оҕуруотчуттар сибиэһэй ноһуому ууга суурайан кутар ньымалара баар. Маннык ньыманы туһанар сатаммат — моркуоп ыарытыйар.