СҮБЭҺИТ: Оҕурсу мөлтөхтүк үүнэр буоллаҕына тугу гынабыт?

Оҕурсуну көрөргө, үүнэрэргэ олус боростуой курдук эрээри, сороҕор үүнээйи эмискэ үүнэрэ тохтуур, сэбирдэҕэ араҕастыйар, аһа суох буолар… Биричиинэтэ туох буолбутун ырытан көрүөҕүҥ — уопуттаах оҕуруоччуттар сүбэлииллэр:

Олордор кэмҥэ буор тымныыта

Оҕурсуну олус эрдэ, буор температурата +15 °C намыһах кэмигэр олортоххо өр ыалдьар уонна үүммэт. Инникигэ сүбэ: оҕурсуну салгын температурата +15 °C үрдүк, буор сылыйбытын кэннэ олордор ордук.

Астара бытархай

Оччотугар азота тиийбэт буолуон сөп. Силиһин анныгар мочевина суурадаһынынан уу кутар көмөлөһүө: 10 лиитирэ ууга 1 остолобуой ньуосканы суурайан.

Сэбирдэхтэрэ кытыыларынан араҕастар, оттон астара груша курдук быһыылаах буоллаҕына

Бу калий тиийбэтин бэлиэтэ. Калий сульфатынан (10 лиитирэ ууга 1 ост.нь.) эбии аһатыҥ эбэтэр күл көөнньөһүгүн кутуҥ (10 лиитирэ ууга 1 ыстакаан күлү суурайан, суукка устата көөнньөрүҥ).

Элбэх уу кутуу

Оҕурсуу сииги сөбүлүүр, ол эрээри бадарааны сөбүлээбэт. Нэдиэлэҕэ 2-3 төгүл сылаас, туруоруллубут ууну кутуохха наада. Куйааска — өссө чаастатык, ол гынан баран кыра-кыралаан кутар ордук. Үүнээйигэ аһара элбэх ууну кутумаҥ — бу силиһэ сытыйарыгар уонна ыалдьарыгар тиэрдэр.

Мөлтөхтүк буоскаланар

Ыҥырыанан буоскаланар суортарга көмөлөһөр гына, минньигэс уунан ыстарыахха сөп (1 л ууга 1 ч.нь. саахар + хааппыла мелисса эбэтэр валериана көөнньөһүгэ). Маны сарсыарда, тыала суох күн эрэ оҥоруҥ.

Сэбирдэххэ үрүҥ бээтинэ үөскээбит

Маннык түбэлтэҕэ бу суурадаһынынан ыстарыҥ: 1 лиитирэ үүт + 10 хааппыла йод + 1 ч.нь. убаҕас мыыла 10 лиитирэ ууга суурайаҕыт. Суурадаһыны кутууну 7-10 хонук буола-буола хатылааҥ.

Сэбирдэххэ эриэн-быраан баастар үөскээбиттэр

Бу антракноз буолуон сөп. Ыалдьыбыт сэбирдэхтэри быһан  кэбиһиҥ уонна 1% бордосскай убаҕаһынан эбэтэр биофунгицидынан («Фитоспорин», «Алирин-Б») ыстарыҥ.

Бары ыарыыттан сэрэтэр судургу ньыма

10 хонук арыттаан ыстарарга кистэлэҥ суурадаһын: 1 л үүт, 20 г хаһаайыстыбаннай мыыла, 30 хааппыла йод. Барытын 10 л ууга суурайан баран кутуҥ. Бу үгүс тэллэй ыарыыларыттан көмүскүүр уонна үүнээйи иммунитетын күүһүрдэр.