Сүбэһит: Оҕурсуну хайдах түргэнник тууһуубут?

Сороҕор туустаах оҕурсуну сиэххин баҕаран кэлэҕин дии. Дьиҥэр, түргэнник оҥоһуллар ньыма баар. Бу ырысыапка уксуус туттуллубат.

1 киилэ оҕурсу, 1 төбө чеснок (хас да өлүүскэ), 1 тутум укроп уонна петрушка, 1 ост.нь. туус, 1 ч.нь. саахар. 

Оҕурсуну үчүгэйдик  сууйабыт, уһуктарын быһабыт, аҥаардыахха, улахан гына бысталыахха сөп. Күөх оттору, чесногу кырбыыбыт. Салаппаан бакыакка оҕурсуну, күөх оту, чесногу, тууһу уган баран, үчүгэйдик сахсыйабыт. Тохтубатын курдук суулаан баран, халадыынньыкка уурабыт.

Оҕурсуну 3-4 чааһынан сиэххэ сөп, ол эрээри, түүнү быһа халадыынньыкка хааллардахха, амтана өссө үчүгэй буолар.

Бу курдук помидордары эмиэ тууһуохха сөп. Эмиэ олус үчүгэй, ураты  амтаннаах, сибиэһэй буолар. Олус түргэнник, судургутук оҥоһуллар, күннээҕи аһылыккытын минньитэр, байытар, аһыыр көҕү көбүтэр, битэмииннээх сокууска бэлэм!