СҮБЭҺИТ: Оҕурсу аһа сиппэккэ эрэ хатар, куурар буоллаҕына тугу гынабыт?

Бүгүн оҕуруотчуттарга оҕурсу аһа сиппэккэ эрэ тоҕо хатарын уонна тугу гыныахха сөбүн туһунан сүбэлэри таһаарабыт. Оҕурсу аһа куурар, хатар биричиинэтэ араас буолуон сөп, ол иһигэр салгын температурата сөп түбэспэт, калий тиийбэт, сыыһа уу кутуу,  уо.д.а. Хас биирдии биричиинэҕэ сиһилии тохтуоҕуҥ.

Оҕурсу аһа сиппэккэ эрэ хатар, куурар төрүөтэ:

Салгын температурата сөп түбэспэт: Оҕурсу салгын температурата уларыйыытыгар олус ылымтыа. Оҕуруот аһа 18-тан 25 кыраадыс сылааска диэри наадыйар. Сылаас уонна тымныы салгын күүскэ оонньоотоҕуна, оҕурсу аһа сиппэккэ эрэ хатан, кууруон уонна түһүөн сөп. Оччотугар үүнээйилэргитин сылааһынан хааччыйыҥ эбэтэр хаххалааҥ!

Калий тиийбэт: Үксүн оҕурсу аһа сиппэккэ эрэ хатар буоллаҕына, иҥэмтэлээх эттиктэрэ, ордук калия тиийбэтиттэн «төннөр». Оҕурсуну монокалий фосфаттаах суурадаһынынан эбии аһатыҥ — 1,5 лиитэрэ ууга 1 остолобуой ньуоска.  Бу ньыманы 3-4 хонук арыттаан икки төгүл хатылааҥ.

Сыыһа уу кутуу: Уу кутууга алҕастары оҥоруу сэбирдэҕэ хагдарыйыытыгар уонна түһүүтүгэр тиэрдиэхтэрин сөп. Сибэккилиир уонна астанар кэмигэр оҕурсуну чаастатык, хас 2-3 хонук аайы, биир квадратнай миэтэрэ сиргэ 6-10 лиитэрэ уута кутуҥ. Оҕурсуга сылаас, эрдэттэн тэпилииссэ иһигэр турбут ууну эрэ туһаныҥ. Тымныы уу үүнээйи силиһин алдьатыан, сытытыан уонна үүнээйи туругун мөлтөтүөн сөп. Уу кутар саамай табыгастаах кэмэ — сарсыарда эрдэ эбэтэр күн-дьыл туругуттан көрөн күнүскү кэм.