СҮБЭҺИТ: Оҕурсууну эбии аһатыы…

Бүгүн оҕурсууга олус туһалаах эбии аһатыы сүбэни кытта үллэстэбит.

Маны оҕуруотчуттар «битэмииннээх» диэн ааттыыллар. Бу сүбэ оҕурсуу үүнэрэ тохтообут эбэтэр куһаҕаннык үүнэр оҕуруотчуттары интэриэһиргэтиэҕэ.

Бу курдук «битэмииннээх» суурадаһыны кутуу кэнниттэн эһиэхэ оҕурсууларгыт үүнүүтэ олус элбэх буолуоҕа, астарын түргэнник биэриэхтэрэ, умнастара күүстээх уонна бөҕө буолуохтара.

Туох нааданый?

• 0,5 лиитирэ сылаас уу;
• 1 остолобуой ньуоска доруоһа;
• 1 остолобуой ньуоска саахар.

Бэлэмнээһин:

1. Ууга доруоһаны кутан, үчүгэйдик булкуйуҥ.
2. Онно саахары эбиҥ уонна өссө төгүл үчүгэйдик булкуйуҥ.
3. Сылаас сиргэ ууран, 2-3 чаас көөнньөрө туруоруҥ. Бу бэлэмнээбит көөнньөһүкпүтүн  5 лиитирэ ууга кутабыт уонна булкуйабыт. Ол кэннэ 5 лиитирэлээх суурадаһыммытыттан биир лиитирэлээх бааҥканы 10 лиитирэ ууга кутабыт. Оччоҕо биһиги суурадаһаммытын икки төгүл убатабыт.

Туһаныыта:

• Оҕурсууларга аан бастаан көннөрү уута кутуҥ.
• Онтон кирээдэлэргэ кураанах күллэ кутуҥ уонна буорга булкуйуҥ.
• Ол кэнниттэн эрэ бэлэмнээбит суурадаһыммытынан хас биирдии оҕурсуу умнаһын анныгар кутуҥ.

Дьэ, итинник туһалаах «битэмииннээх» эбии аһатыы оҕурсуу үүнүүтүн элбэтиэ. Сүрүнэ диэн маннык эбии аһатыы оҕурсуу икки  сэбирдэхтэммит буоллаҕына биирдэ оҥоһуллар.