СҮБЭҺИТ: Оҕуруот аһыттан кэнсиэрбэлэр, түргэн, тотоойу аһылыктар

Билигин оҕуруот аһын арааһа саамай ситэр, өлгөм үүнүүнү биэрэр кэмэ. Биир элбэх битэмииннээх, олус туһалаах оҕуруот аһынан кабачок буолар. Үгүстэр кабачогу арыыга эрэ ыһаарыланар уонна кэнсиэрбэ эрэ оҥорон сиир курдук өйдүүллэр. Оттон кабачок духуопкаҕа олус судургутук уонна түргэнник буһар аһылык буолар. Кабачогу эриллибит эти, ыһаарыламмыт моркуобу, луугу кытта араастаан буһарыахха сөп. Бэйэтинэн да духуопкаҕа биһилэхтии быһан буһаран ыллахха, эти, балыгы кытта дьүөрэлээн гарнир быһыытынан сиэххэ сөп. Оттон уһуннук хаһааныллар, кыстыгы туоратар, сайыны санатар эбии аһылык — кабачоктан оҥоһуллар лечо буолар.

Кабачоктаах, помидордаах лечо

Эйиэхэ наада: икки киилэ кабачок, төгүрүк луук — 10 устуука, помидор — 10 устуука, болгарскай биэрэс — биэс устуука, томатнай пааста — 400, сахар — 250 гр, туус — 1 ост. ньуоска, мас арыыта — 250 мл, 9% уксус — 100 мл.

Улахан тимир көстүрүүлэҕэ куубуктуу быһыллыбыт кабачоккутун, помидоргутун уонна лууккутун, биэрэскитин кутуҥ (кабачогу сиэмэтиттэн ыраастыыбыт). Мас арыытын үрдүгэр кутан баран туустааҥ, саахардааҥ уонна оргууй барытын тэҥҥэ булкуйуҥ. Оргуйбутун кэннэ 25 мүнүүтэ тэптэрэн туруора түһүҥ. Ити кэннэ томатнай паастаҕытын кутан баран өссө 15 мүнүүтэ буһарыҥ. Буһуо 5 мүнүүтэ хаалбытын кэннэ уксускутун кутуҥ. Эрдэттэн сууйуллубут, хаппахтаах таас бааҥкаларга кутуҥ уонна сойуор диэри туруоруҥ.

Аһыы лечо

Сорох дьон аһыыны сөбүлүүллэр. Онон бу лечо кинилэргэ туһуланар.

Эйиэхэ наада:

2,5 киилэ кабачок, 1,5 киилэ болгарскай биэрэс, 1 киилэ моркуоп, 1,7 киилэ төгүрүк луук, 4 устуука чили биэрэс, кыра мас арыыта, туус, 1,5 ч. ньуоска саахар, кыра хара биэрэс, кыра кориандр.

Кабачогу сиэмэтиттэн ыраастаан баран куубуктуу быһыҥ, туустаах ууга кыратык сытыара түһүҥ. Помидоры, биэрэһи ыраастаан баран куубуктуу быһыҥ. Моркуобу теркалыыбыт. Кабачоктан саҕалаан балары барытын уочаратынан арыыга ыһаарылаан ылабыт. Улахан иһиккэ барытын холбуубут, туус, саахар кутабыт, биэрэс, кориандр уонна чили биэрэһи бытархай гына бысталаан кутабыт. Кыра уокка 40 мүнүүтэ устата булкуйа туран буһарабыт. Буһуо 5 мүнүүтэ иннинэ уксуспутун кутабыт. Бу лечоҕа чили биэрэс куппатахха, кини көннөрү кэнсиэрбэ аһылык курдук эмиэ сиэниллиэн сөп.

Эт аһылыкка эбилик лечо

Бу лечоны уһун кыһын устата хаһаанан баран соркуойга эбилик гыныахха сөп.

Эйиэхэ наада: кабачок — 500 г, баклажан — 2 устуука, төгүрүк луук — 2 устуука, моркуоп — 2 устуука, болгарскай биэрэс — 4 устуука, помидор — 1 киилэ, туус — 2 ч. ньуоска, саахар — 2 ост. ньуоска, мас арыыта — 100 мл, уксус 9% — 4 ост. ньуоска, хара төгүрүк биэрэс — ч. ньуоска аҥаара.

Кабачогу, баклажаны, луугу, моркуобу барытын куубуктуу быһабыт. Кабачок сиэмэтин быраҕабыт. Болгарскай биэрэһи соломолуу быһабыт. Барыларын көстүрүүлэҕэ кутабыт. Ити кэннэ помидору бытархай гына бысталыыбыт, туус, саахар, мас арыыта, биэрэс эбэн баран барыларын кытта холбуубут. 40 мүнүүтэ устата тэптэрэн буһарабыт. Бүтэһигэр уксус кутабыт, булкуйабыт уонна туруора түһэбит. Ыраас бааҥкаларга кутан ыга хаппахтаан сойутан баран уһун кэмҥэ хаһаана уурабыт.