Сүбэһит: Оҕуруот аһыттан күһүҥҥү пюре

Хортуоскаттан эрэ буолбакка, атын оҕуруот аһыттан минньигэс, туһалаах пюре оҥоһулларын билэҕит дуо? Бу маннык илдьиритиллибит пюрены буспут оҕуруот аһын сиэбэт оҕолорго сиэтэн, битэмиининэн хааччыйыахха сөп.

Моркуоптан пюре

400 г моркуоп, 100 г үүт, 8 г саахар, туус, ост.нь. ынах арыыта.

Моркуобу ыраастаан баран, бөдөҥ гына бысталаан, оргуйа турар ууга уган, хаппахтаан баран, мөлтөх уокка буһарабыт. Моркуоп сымнаатаҕына (биилкэнэн анньан көрөбүт), хостоон ылан, блендергэ эрийтэрэбит, эбэтэр, итиилии биилкэнэн илдьиритэбит. Итии үүтү кутабыт, туустуубут, саахардыыбыт, арыы эбэбит.

Бу маннык пюренан оҕону 5 ыйыттан, арыылаах буоллаҕына, 6 ыйыттан аһатан, сии үөрэнэрин ситиһиэххэ сөп. Буспут оҕуруот аһын сиэбэт оҕолорго хааһыларыгар, мииннэригэр, торуойдарыгар булкуйан биэриэххэ сөп. Саахардаамыахха да сөп. Улахан дьон хортуоска пюретын курдук, торуойдарын кытта сииллэр.

Моркуоп А битэмииннээх, бета-каротиннаах, онон харахха туһалаах. Күннээҕи аһылыкка хайаан да баар буолуохтаах.

 

Тыыкыбаттан пюре

400 г тыыкыба, 200 мл үүт, 1-2 ост.нь. ынах арыыта, туус.

Тыыкыбаны ыраастаан, кырбастаан баран, кыра ууга буһарабыт. Сымнаабытын кэннэ, хостоон ылан, илдьиритэбит, итии үүт кутабыт, туустуубут. Блендеринэн өссө эрийтэрэбит уонна 2-3 мүнүүтэ буһарабыт, арыы эбэбит.

Тыыкыба пюретын оҕоҕо 6 ыйыттан бэриллэр. Балык, эт, быар кэтилиэтин кытта сиэтэххэ, олус туһалаах, рахиттан, анемияттан харыстыыр. Элбэх битэмииннээх уонна тотоойу, судургутук оҥоһуллар бүлүүдэ. Өссө шпинаты, сүбүөкүлэ суогун, күөх гороҕу эбиэххэ сөп.

Күһүҥҥү кэмҥэ, тыыкыба сибиэһэй, элбэх эрдэҕинэ, хортуоскаттан, мокоруонтан, ристэн хал буоллаххытына, оҕуруот аһыттан пюрелары оҥостуҥ.