СҮБЭҺИТ: «Оливье» салаат — үс саҥа ырысыап

«Оливье» салаат, саарбаҕа суох, Саҥа дьыллааҕы остуолга саамай биллэр уонна тапталлаах бүлүүдэнэн буолар. Тас дойдуларга «нуучча салаата» диэн ааттыылар. Ырысыаба төһө эмит хаста да уларыйдар, пуобардар тохтообокко саҥаттан-саҥа, дьикти ырысыаптары айаллар.

Кэлэн иһэр 2026 сылга остуолгутун саҥалыы «оливьенан» киэргэтэр үс араас ырысыаптары кытта билиһиннэрэбит. Классическайтан саҕалаан, аныгылыы, ураты амтаннаах ырысыаптары боруобалаан көрүҥ.

Классическай «Сэбиэскэй» ырысыап

Бу барыбытыгар оҕо саастан биллэр, үйэлэргэ тургутууну ааспыт ырысап. Уруккуну санатар бүлүүдэ.

Туох нааданый:

• «Докторская» халбаһы – 300 гр.;
• Хортуоппуй – 4-5 уст. (орто);
• Моркуоп – 2 уст. (орто);
• Сымыыт – 5 уст. ;
• Маринуйдаммыт оҕурсу – 4-5 уст.;
• Кэнсиэрбэлэммит горох – 1 бааҥка (400 гр.);
• Майонез – 200-250 гр. (амтанынан);
• Луук – 1 уст. (кыра);
• Туус, биэрэс – амтанынан көрөн.

Хайдах астыыбыт: Хортуоппуйу, моркуобу уонна сымыыты буһарабыт. Сойутан баран хахтарын ыраастыыбыт. Халбаһыыны, хортуоппуйу, моркуобу, сымыыты уонна оҕурсуну тэҥ гына, кыра кубиктарынан кырбыыбыт. Луугу олус кыра гына кырбыыбыт. Дириҥ иһиккэ бары кырбаммыт ингредиеннары, гороҕу (уутун сүүрдэн баран) кутабыт. Туустуубут, биэрэстиибит, майонезтаан баран үчүгэйдик булкуйабыт. Остуолга ууруох иннинэ 1-2 чаас халадьыылынньыкка туруоран ылар ордук.

Кууруссалаах уонна дьаабылакалаах салаат

Бу ырысап  амтаны сибиэһэй, чэпчэки оҥорор. Дьаабылака кыратык минньигэс-аһыы амтаны биэрэр.

Туох нааданый:

• Куурусса филетэ – 400 гр.;
• Хортуоппуй– 3-4 уст.;
• Моркуоп – 1 уст.;
• Сымыыт – 4 уст.;
• Сибиэһэй оҕурсу – 2 уст.;
• Кэнсиэрбэлэммит горох – 1 бааҥка;
• Дьаабылака (холобур, «Гренни Смит») – 1 уст.;
• Майонез, туус, биэрэс – амтанынан.

Хайдах астыыбыт:  Куурусса этин туустаах ууга буһарабыт (20-25 мүнүүтэ), сойутабыт уонна кыра гына кырбыыбыт. Хортуоппуйу, моркуобу, сымыыты буһарабыт, сойутабыт, ыраастыыбыт. Хортуоппуйу, моркуобу, сымыыты, оҕурсуну уонна хаҕын ыраастаан баран дьаабылаканы кубиктыы гына кырбыыбыт. Дьаабылака хараарбатын диэн, лимон уутунан ыстарар ордук. Барытын холбуубут, горох кутабыт, туустуубут уонна майонезтыыбыт. Бу салааты тута сиир ордук, тоҕо диэтэххэ сибиэһэй оҕурсу уонна дьаабылака уута тахсар.

Кыһыл балыктаах уонна авокадолаах салаат

Бу – дьиҥнээх деликатес, бырааһынньыктааҕы остуолу киэргэтэр ураты бүлүүдэ.

Туох нааданый:

• Кыратык тууһаммыт кыһыл балык (семга, форель) – 300 гр.;
• Хортуоппуй – 3 уст.;
• Сымыыт – 3 уст.;
• Авокадо – 1 уст. (сиппит, сымнаҕас) ;
• Сибиэһэй оҕурсу – 2 уст. ;
• Кэнсиэрбэлэммит горох – ½ бааҥката.;
• Лимон уута – 1-2 ост. нь.;
• Майонез эбэтэр йогурт соус (майонез + сметана);
• Күөх үүнээйи (укроп, петрушка) – киэргэтиигэ.

Хайдах астыыбыт: Хортуоппуйу уонна сымыыты буһарабыт, сойутабыт, ыраастыыбыт уонна кубиктыы гына кырбыыбыт. Кыһыл балыгы, оҕурсуну эмиэ кубиктыы кырбыыбыт. Авокадоны хаҕыттан ыраастаан, уҥуоҕун ылан баран кубиктыы кырбыыбыт уонна хараарбатын диэн лимон уутунан кутабыт. Бары ингредиеннары сэрэнэн булкуйабыт (балык ыһыллыбатын курдук). Горох, туус, биэрэс эбэбит. Соуһунан (майонез эбэтэр йогурт соус) булкуйан баран, үрдүн күөх үүнээйинэн киэргэтэбит. Бу салаат тута сиэниллэр.

Минньигэстик аһааҥ!