Сүбэһит: Пицца тиэстэтин сөпкө оҥоруохха

Пиццаны дьиэҕэ да оҥоруохха сөп, ол эрээри, үксүгэр тиэстэтин сатаабаппыт. Дьэ, итальянскай шеф-повар ырысыабынан оҥорон көрүөххэ.

500 г бурдук, 250-300 мл сылаас уу, 25 г сибиэһэй пекарскай  доруоһа (эбэтэр, 2 кыра бакыат хаппыт доруоһа — 16 г), 2 ч.нь. туус, 1 ч.нь. саахар, кымаах саахар, 3 ост.нь. оливка арыыта.

Иһиккэ доруоһаны кутан, 3 ост.нь. сылаас ууну уонна биир кымаах саахары кутан, булкуйан баран, 15 мүнүүтэ туруорабыт. Миискэҕэ бурдугу кутабыт, кытыытынан тууһун таммалатабыт, ортотугар күүгэннирбит доруоһабытын кутабыт. Саахар, арыы, сылаас уу эбэн, булкуйан баран, 5-10 мүнүүтэ тиэстэни мэһийэбит. Бэйэҕит көрөн, уу, эбэтэр, бурдук эбэн биэриэххэ сөп. Тиэстэ уунаҥнас, киһи илиитигэр сыстыбат буолуохтаах.

Тиэстэни улахан миискэҕэ угабыт, быһаҕынан үрдүн кириэстии хайа сотобут. Хаппатын курдук, инчэҕэй салпыакканан, таҥаһынан сабабыт уонна 1-2 чаас туруорабыт. Тиэстэ сылаас, хантан да тыал үрбэт сиргэ туран, түргэнник үллэр. Тиэстэ икки төгүл үллүбүт буолуохтаах.

Биир пиццаҕа сөп түбэһэринэн, тиэстэни хас да чааска араара быһабыт, төгүрүтэбит. Арыынан биһиллибит иһиккэ (боротумуоҥҥа) тэнитэн уурталыыбыт. Эмиэ инчэҕэй сотторунан сабан баран, 30 мүнүүтэ туруоран, өссө үлүннэрэбит.

Пиццаны бэйэҕит сөбүлүүр ырысыапкытынан салгыы буһарыаххытын сөп. Минньигэстик аһааҥ!