СҮБЭҺИТ: Клярга «сууламмыт» балык

Ханнык баҕарар балыгы буһарыах иннинэ маринадка туруордахха, олус минньигэс буолар.  Оттон ону эбии пиибэлээх клярга «суулаатахха», дьэ, дьикти, ураты минньигэс ас тахсар. Бу ырысыап олус судургу уонна чэпчэки. Ханнык баҕарар балыктан астыаххытын сөп.

Биһиэхэ наада (сабаҕалаан 2 порцияҕа):

• 700 грамм балык этэ;
• икки лимон өлүүскэтэ;
• 3 сымыыт (улахан);
• ханнык баҕарар хараҥа пиибэ;
• ыраастаммыт оливковай арыы;
• 3 остолубуой ньуоска бурдук;
• быыкаайык сибиэһэй петрушка;
• туус уонна биэрэсамтанын көрөн.

Маринад бэлэмниибит

Балыгы сууйуҥ, сиһин уонна ойоҕос уҥуохтарын ыраастааҥ, этин кырбастааҥ. Тириитин хаалларыҥ. «Маринад» биир мүнүүтэнэн оҥоһуллар.  Бастаан балыкка аһыы амтаны биэрэргэ, лимон уутун кутуҥ. Онтон амтанын көрөн туустааҥ, хас да лабаа кырбаммыт петрушканы  уонна хара биэрэһи эбиҥ. Биир остолубуой ньуоска оливковай эбэтэр мас арыытын кутуҥ. Балык этин маринадка 20 мүнүүтэҕэ хаалларыҥ.

Балык «суутун» оҥоробут

Сымыыты алдьатыҥ уонна саһархайын арааран, үрүҥүн иһиккэ кутуҥ. Саһархайын быраҕымаҥ, кэлин сырник эҥин курдук аска туттуохха сөп. Сымыыт үрүҥүн миксер иһитигэр кутуҥ. Эһиги соруккут – хойуу күүгэни оҥоруу. Ол инниттэн бастаан биир мүнүүтэ миксер саамай намыһах түргэнигэр ытыйыҥ, онтон быыкаайык тууһу кутан баран, өссө биир мүнүүтэ орто түргэҥҥэ ытыйыҥ. Дьэ, сөптөөх кириэм бэлэм буолла. Иһити иҥнэрдэххэ, күүгэн тохтубат буолуохтаах. Үрүҥҥэ 6 остолубуой ньуоска ханнык баҕарар хара пиибэни кутуҥ, маассаны сэрэнэн биилкэнэн булкуйуҥ, онтон 3 остолубуой ньуоска бурдугу кута-кута  булкуйуҥ.

Ыһаарылыыбыт

Ыһаарылыырга ыраастаммыт оливковай эбэтэр мас арыытын туттуҥ. Хобордооххо элбэҕи кутуҥ, арыы үрдүгэ 2 см-тан кыра буолуо суохтаах. Хас биирдии балыгы икки өттүттэн клярга булкуйан, хобордооххо ууруҥ. Уоту орто күүһүгэр туруоруҥ.  Сэрэнэн, кляры алдьаппакка, балыгы эргитиҥ.

Минньигэстик аһааҥ!