Сүбэһит: Сахалыы лэппиэскэни оҥоруу кистэлэҥнэрэ

Лэппиэскэ, дьиҥэ, олус судургутук буһарыллар. Ол эрээри, сорохторго сатаммат, үллүбэт, хатыччы хатан хаалар, сип-синньигэс буолар. Дьэ, бу кистэлэҥэ туохханый? Куруук табыллар ырысыаппын үллэстиим.

 

Бастаан 1 ыстакаан суоракка (кефиргэ) 1 ч.нь. (өрөһөлүү буолбатах) суоданы кутан, булкуйан баран, 10-15 мүнүүтэ туруорабыт. Дьэ, кистэлэҥэ бу баар. Аһыы суоракка киирэн, суода арыллар, үлэлээн барар. 10 мүнүүтэнэн суораппыт үллүбүт, күүгэннирбит буолар.

2 сымыыты, 1 ч.нь тууһу, 1-2 ост.нь. саахары уонна бурдугу кутан баран, тиэстэни мэһийэбит.

Иккис кистэлэҥэ: бурдугу барытын кутан кэбиһимэҥ, кыра-кыралаан, булкуйа туран, кутуҥ. Барытын биирдэ кутан кэбистэххэ, лэппиэскэ үллүбэт, кытаанах буолар. Элбэх бурдук эмиэ наадата суох. Илиигэ сыстыбат, сымнаҕас тиэстэ буоллаҕына, сөп. Дьэ, бу тиэстэбитин 5 мүнүүтэ мэһийэбит.

Үһүс кистэлэҥэ: ол туран, «махтал, таптал, дьол!», «чэгиэн буолуҥ, дьоллоох буолуҥ!»  диэн ботугуруоххутун, оҕолоргут, кэргэҥҥит астына мотуйуохтарын саныы-саныы, үтүө санааларгытын, үөрүүгүтүн тиэрдиэххитин сөп. Оччоҕо тиэстэ үөрүү, махтал эниэргийэтин ылынар, ийэ аһа ол иһин  ураты минньигэс буолар. Астыыр кэмҥэ куһаҕаны санаамаҥ, куһаҕан сонуннары көрүмэҥ.

Төрдүс кистэлэҥэ: тиэстэбитин мэһийэн баран, ыраас сотторунан сабан, 15-20 мүнүүтэ туруора түһэбит. Бу кэмҥэ тиэстэ тыынар, үллэр, сымныыр.

Буһарар иһити арыынан сотон баран, тиэстэбитин уурабыт. Наһаа синньигэс гына тэниппэппит, 5-6 см халыҥнаах буолар. Үрдүн  ынах арыытынан сотобут, биилкэнэн дьөлүтэ анньыахха сөп.

Итии духуопкаҕа уган, 180 кыраадыска буһарабыт. Үрдэ саһарчы бустаҕына, мас үтэһэнэн дьөлө анньан, иһэ буспутун бэрэбиэркэлиибит. Буһа турдаҕына, духуопка аанын арыйбаппыт. Олус хатаччы буһарбаппыт.

Дьэ, сып-сымнаҕас, үллүбүт уонна үтүө эниэргийэни иҥэриммит лэппиэскэни сылаастыы арыылаан, эбэтэр,  сүөгэйдээн, барыанньалаан баран, минньигэстик аһааҥ!