СҮБЭҺИТ: Селедкаттан судургу сокууска

Ааспыкка Саҥа дьылааҕы сандалы солбуллубат олохтооҕо буолбут «саҕынньахтаах селедка» салаат оннугар рулет оҥорору сэргээбиккит. Аны бырааһынньыктааҕы сандалыны киэргэтэр кыахтаах, өссө судургутук оҥоһуллар сокууска ырыссыаба баар.

1 сүбүөкүлэни, 1 моркуобу, 1 сымыыты ууга буһаран баран, түөркэлиибит. Хойуу сүөгэйи (майонеһы), 1 өлүүскэ чесногу кыра гына кырбастаан баран, кутабыт, туустуубут, мэлиллибит хара биэрэһи эбиэххэ сөп. Булкуйан баран, халадыынньыкка угабыт.

Хара килиэби синньигэс гына быһан баран, духуопкаҕа 5-6 мүнүүтэ хатара түһэбит. Олус өр тутумаҥ, аһара хатан, хоруоран хаалыаҕа. Онтон килиэп куһуоктарын чесногунан сотобут.

Бу килиэп үрдүгэр сүбүөкүлэлээх начыыҥкабытын, ол үрдүгэр тууһаммыт селедка куһуогун уурабыт, күөх луугунан, эбэтэр, петрушканан, эриэппэ луугунан  киэргэтэбит.

Сокууска тупсаҕайдык көстөрүн туһугар, килиэби төгүрүктүү, эбэтэр, түөрт муннуктуу эрээри, кыра соҕус гына быһыахха наада.