СҮБЭҺИТ: Шах-плову сатыыгын дуо?

Плов биһиги төрүт аспыт буолбатах эрээри, үгүс ыал билигин сөбүлээн астанар. Плов диэн ристээх эт соркуойа буолбатах. Бу — элбэх эбилик оттоох-мастаах, туустаах ураты аһылык. Пловтартан эрэ бастыҥы — шах-плову астаан дьоҥҥутун күндүлүөххүтүн сөп.

Эһиэхэ наада:

Басмати ириис — 1,5 ыстакаан

Туус

Мас арыыта — 180 гр

Куркума — — 1/2 ч.ньуоска

Куурусса буута (бараан этэ) — 600 гр

Төгүрүк луук — 1 устуука

Моркуоп аҥаара

Курага — 60 гр

Изюм — 40 гр

Чусунуок — 5 тиис

Биэрэс (приправа)- бэйэҥ көрөн кутаҕын

Зира — 1/2 ч.ньуоска

Чараас лаваш

Бу плову астыырга куурусса, бараан этэ уонна сыалаах ынах этэ барсыан сөп. Бастаан ирииспитин буһарабыт. Аһары сымнаан хаалбатын курдук ситэ буһарбаппыт. Буһа турдаҕына куркумабытын эбэбит.

Атын иһиккэ луугу, эти ыһаарылыыбыт. Эти аһары хатардыбакка буһарабыт уонна киниэхэ туус, биэрэс, куркума, зира кутан салгыы кыратык ыһаарылаан ылабыт. Дьэ, ол кэннэ эппитигэр сууйуллубут курага, изюм кутабыт, мас арыытын эбэбит уонна салгыы ыһаарылыыбыт. Аһары уһуннук ыһаарылыыр табыллыбат.

Синньигэс лаваһы 6 см кэтиттээх гына уһун гына бысталыыбыт. Казан эбэтэр сыһыарбат дириҥ хобордооҕу түгэҕин ынах арыытынан сотон баран, лаваш быһыллыбыт сурааһыннарын тэлгиибит. Ол тэлгиирбитигэр лаваш кытыылара иһиппит таһынан ыйана сылдьалларын курдук учуоттуубут. Лаваһы ис өттүттэн эмиэ ынах арыытынан сыбыыбыт уонна ирииспит аҥаарын кутабыт. Ирииһи иһит курдук түгэҕэр сэрэнэн баттыыбыт. Ол ириистэн оҥоһуллубут иһиккэ эттээх курагабытын,  изюммутун  кутабыт. Ол кэнниттэн ордубут ирииһи саба кутабыт. Арыынан үрдүн сотобут уонна лавашпыт ыйана сылдьар кытыыларынан ирииспитин бүөлүү сабан кэбиһэбит.

Арыылыыбыт уонна 180 кыраадыс итиигэ чаас устата духуопкаҕа, оһоххо буһарабыт. Бустаҕына сэрэнэн кэтит тэриэлкэҕэ пловтаах иһити умса уурабыт уонна дьиэлээхтэрбитин күндүлүүбүт.