СҮБЭҺИТ: Сиэниллэр иһиттээх соркуой

Хас күн аайы хаһаайкалар «киэһэ тугу буһарабын?» диэн толкуйдууллар. Күннээҕи астан киһи түргэнник хал буолар. Бүгүн ураты соҕустук оҥоһуллар, тотоойу бүлүүдэни астаан көрүҥ.

Бу бүлүүдэҕэ ынах, убаһа, сибиинньэ, куурусса этэ барсар. Тиэстэтин иһит курдук оҥорон баран, бэйэтигэр бүскүтэн буһарыллар.

Тиэстэтэ: 200 мл сылаас уу, 80 г ууллубут ынах арыыта, 1 сымыыт, 500 г бурдук, туус. Тиэстэтин биһэргэ 1 сымыыт уоһаҕа.

Начыыҥката: 300 г эт, 400 г хортуоска, 1 эриэппэ луук, 1 моркуоп, 150 г черри помидор, 2 ост.нь. ынах арыыта, чеснок, базилик, тимьян, хара биэрэс (приправаны бэйэҕит көрөн кутаҕыт), туус, 6 ост.нь. уу.

Тиэстэтин үчүгэйдик мэһийэбит, сабан баран, 20-30 мүнүүтэ сынньата уурабыт.

Начыыҥката соркуой курдук буолар. Эти, хортуосканы, моркуобу, луугу  кырбаан баран, приправа, туус, уу кутан, миискэҕэ булкуйабыт.

Тиэстэни түөрт гына аҥаардыыбыт. Икки куһуога улахан соҕус, өссө иккитэ  кыра буолуохтаахтар.  Ыраас иһиккэ (1 лиитэрэлээх көстүрүүлэ, миискэ, салатник буолуон сөп) тэнитиллибит тиэстэни ууран баран, начыыҥкатын кутабыт. Ол үрдүгэр аҥаардаммыт помидордары уурабыт.

Тиэстэ кытыытын иһиттэн арааран, начыыҥкаҕа сыһыарабыт. Үрдүгэр тэнитиллибит кыра тиэстэни саба уурабыт, горшок курдук быһыылаах буолуохтаах, бу иккис тиэстэнэн хаппахтаан кэбиһэбит. Кытыытын быһыта тутан,  үчүгэйдик хам сыһыарабыт. Кыра тиэстэ ордугунан, хаппах тутааҕын оҥорон, сыһыарабыт.

Бу икки горшогу сымыыт уоһаҕынан сыбаан баран, 180 кыраадыс итии духуопкаҕа 45-60 мүнүүтэ буһарабыт.

Буспутун кэннэ, хаппаҕын быһаҕынан быһан, арыйабыт. Соркуойа сырдьыгыныы сылдьар буолар. Хаппаҕын, иһитин эмти тутан ыла-ыла, соркуойун кытта килиэп курдук сиэн кэбиһэбит. Хата, иһит киртийбэт, бэртээхэй!