СҮБЭҺИТ: Симэһиннээх биэрэс туспа көрүүгэ наадыйар

Биэрэс эмиэ туспа аһатыыга, көрүүгэ-истиигэ наадыйар. Оччотугар «күһүн өлгөм үүнүүнү ылыахха сөп» диэн уопуттаах оҕуруотчуттар сүбэлииллэр.

Биэрэс өлгөм үүнүүтүн ыларга аһатыытын былаанын сөпкө тэрийиэххэ наада. Бүгүн табыгастаах уонна туһалаах аһатыылары кытта билиһиннэрэбит. Биэрэс ситэрин, аһа ордук симэһиннээх буоларын туһугар буора сииктээх буоларын көрүҥ, күн ахсын көннөрү уунан кутарынан хааччыйыҥ, аһатыыны ыйыллыбыт болдьоҕунан оҥоруҥ, үүнээйи туругун кэтээн көрүҥ.

Калийдаах аһатыы

Сульфат калия диэн уоҕурдуунан суурадаһын оҥоробут: 1 лиитирэ ууга 1 ч.нь. сульфат калия кутабыт. Аһатыыны нэдиэлэҕэ биирдэ оҥоробут. Оччотугар аһа түргэнник үүнэр, ону таһынан күһүн олус симэһиннээх буолар.

«Натуральнай» аһатыы:

Ханнык баҕар иһиккэ аҥаарынан оту кырбаан кутабыт уонна уу кутан баран, 5-7 хонук устата аһыта туруорабыт. Бу суурадаһын 1:10 кээмэйинэн оҥоһуллар. Уу кутарга суурадаһыны кытта булкуйан ыһарга туһаныллар.

Мас күлэ

Биир бааҥка күлү 20 лиитирэ ууга суурайабыт. Бу суурадаһынынан биэрэстэрбитин 10-14 күн (ыйга биирдэ) арыттан кутар ирдэнэр.