СҮБЭҺИТ: Сирэй тириитин көрүү-харайыы

Саас кэлэн, күн уота күүһүрэн, сирэй тириитигэр дьайара күүһүрдэ. Ордук «кураанах» тириилээх дьон сирэйдэрин көрүнэ, харыстана сылдьыахтаахтар.

Күн күүстээх уота тириини сиир дииллэр. Онон сааскыттан саҕалаан, SPF харысхаллаах кириэми туттан барыллыахтаах. Сарсыардааҥҥы уонна киэһээҥҥи күн уота UF-сардаҥата кыра буолан, тириигэ куттала суох, онон бу кэмҥэ таһырдьа сылдьан, күнтэн Д битэмиини ылыллыахтаах.

Кураанах тирии чараас буолар, куурар-хатар, хатырар, кыһыйар, эрдэ кырдьар, 25 саас кэннэ номнуо мырчыстаҕастанар. Холобур, сыалаах тириилээх дьон эдэр сылдьан, хатаалтан эрэйдэнэр буоллахтарына, сааһырдахтарына, сирэйдэрэ соччо мырчыстыбат.

Кураанах тирии киһиэхэ төрүөҕүттэн бэриллэр эбэтэр үөс, ноор, щитовиднай былчархай ыалдьарыттан, гормон атастаһыыта кэһиллиититтэн уонна сыыһа көрөртөн-харайартан буолуон сөп.

Үөс үчүгэйдик үлэлээбэт буоллаҕына, тирии кууран-хатан барар, хатырар (ордук тилэх, тоҥолох). Оттон үчүгэйдик үлэлиирин туһугар сыалаах-арыылаах ас наада (ынах арыыта, рафинацията суох үүнээйи арыыта). Күннээҕи аска лүөн, оливка арыыта, балык, эриэхэ, авокадо баар буолуохтаах.

Ньээм-ньээм, расторопша, календула, дөлүһүөн, тимэх от, үөрэ, о. д.а. үүнээйилэр үөскэ олус туһалаахтар. Аччык искэ сылаас ууну иһэ сырыттахха, үөс үлэлээн барар. Маны тэҥэ, бырааска көрдөрөн, үөһү эмтэниллиэхтээх.

Аҕыйах ууну иһэр буоллахха, тирии эмиэ кууруон-хатыан сөп. Холобур, дьахтар элбэх гаастаах утаҕы, минньигэс суогу, чэйи, кофены иһэр эрээри, ыраас ууну испэт буоллаҕына, этэ-сиинэ иһиттэн кууран-хатан барар. ВОЗ ирдэбилинэн, ыйааһын 1 киилэтигэр 30 гр ууну иһиллиэхтээх. Ол эбэтэр, 50 киилэлээх дьахтар күҥҥэ 1,5 лиитирэ ыраас ууну (чэй, утах аахсыллыбат!) иһиэхтээх.

A, C, E, Д битэмииннэри, Омега‑3, алтан, селен, кремний, тимир, магний минераллары иһиэххэ сөп (анаалыс кэнниттэн). Сөпкө утуйуу уонна истириэстэн тахсыы эмиэ суолталаах.

Косметологияҕа физиотерапия, массаас, биоревитализация, мезотерапия, кислородотерапия, озонотерапия ньымалара көмөлөһүөхтэрин сөп. Күннээҕи кириэмҥэ гиалуроновай кислота баар буолуохтаах.

Биһиги салгыммыт олус куураайы, ордук кыһыҥҥы өттүгэр оттук саҕаланнаҕына, дьиэ салгына куурар. Онон дьиэҕэ салгыны сиигирдэр тэриллэри туһаныҥ. Муоралаах сиргэ бардахха, киһи сирэйэ сымнаан хаалар, куурарын-хатарын “умнан” кэбиһээччи, онон салгын сиигэ эмиэ оруоллаах.

Кураанах тириилээх киһи күн аайы көрүнэ, сөпкө ыраастыы, кириэминэн эрэ буолбакка, араас мааскаларынан “аһата” сылдьыахтаах. Сааһыран эрэр дьахтар косметологка сылдьан, кини сүбэтин туһаныахтаах.

Туһалаах мааскалар

Иэдьэгэйдээх

2 ост. нь. сымнаҕас иэдьэгэйгэ 1 ост. нь. мүөтү уонна 1 ост. нь. кэпиири булкуйаҕыт. Сирэйгэ биһэн баран, 25 мүн. кэтэһэҕит. Онтон сууйан кэбиһэҕит. Нэдиэлэҕэ иккитэ оҥостуохха сөп. Бу мааска тирии хатырбытын сымнатар.

Сүөгэйдээх

Петрушканы кыра гына кырбаан, сүмэһинин таһааран баран, хойуу сүөгэйгэ булкуйабыт. Чаас аҥаарын кэриҥэ сирэйгэ тутабыт, мыылата суох сууйабыт. Петрушкалаах буолан, сирэйи маҥхатар уонна сымнатар.

Эбиэстээх

Геркулеһы блендергэ эрийтэрэн эбэтэр эбиэс бурдугун туһаныахха сөп. 1 ч. нь. олива арыытын, биирдии хааппыла А, Е битэмииннэри (аптекаҕа атыыланар) эбэн, булкуйуллар. Сирэйгэ 20 мүн. тутуллар, онтон сууйуллар.

Сымыыттаах

Сымыыт үрүҥүн эрэ ылан, күүгэннириэр диэри ытыйыллар, онтон 1 ост. нь. мүөтү эбэн, булкуйуллар. Маасканы биһиэх иннинэ, сирэйи кириэмниэххэ сөп. 15 мүн. сууйуллар.

Желатиннаах

Желатин кыра мырчыстаҕастары суох оҥорор. Желатин бороһуогун сылаас ууга булкуйаҕыт, уута үс төгүл элбэх буолуохтаах. Хомуога суох буолуор диэри булкуйаҕыт. 15–20 мүнүүтэнэн желатин үллэн тахсар. Желатиннаах иһити итии уулаах иһиккэ уган, убатыахха сөп (водяная баня). 1 ост. нь. алоэ сүмэһинин, А, Е битэмиин хааппылаларын кутан, булкуйуллар. Сирэйгэ 20 мүнүүтэ тутуллар.

Банааннаах

Сымнаҕас банааны илдьиритэн баран,
1 ост. нь. оливка арыытын уонна 1 сымыыт уоһаҕын булкуйаҕыт. Сирэйгэ 15 мүнүүтэ тутаҕыт. Бу мааска сирэйи битэмииннэрин “аһатар”.

Мүөттээх

1 ост. нь. мүөккэ 1 ост. нь. үүтү кутан, булкуйан баран, сирэйгэ 15–20 мүнүүтэ тутуллар.

2‑с ньыма. Алоэ 1 улахан сэбирдэҕин иһинээҕи сымнаҕаһын уонна 1 ч. нь. мүөтү, 1 сиикэй сымыыт уоһаҕын булкуйан, 20 мүнүүтэ сирэйгэ тутуллар. Баатаны инчэтэн, сэрэнэн маасканы сотуллар, онтон муус кубигынан сирэйи сотор туһалаах.

Оҕурсуулаах

Оҕурсуну түөркэлээн баран, сүөгэйи эбэтэр чөчөгөйү кытта булкуйуллар. Сирэйгэ ууран баран, маарыланан саптыллар. Олус убаҕас буоллаҕына, уутун ыга түһүөххэ сөп. 20 мүнүүтэнэн уунан суунан кэбиэһэҕит. Мааска маҥхатар уонна сымнатар.

Лүөннээх

Лүөн сиэмэтэ элбэх битэмииннээх, антиоксиданнаах. 1 ост. нь. илдьиритиллибит лүөн сиэмэтигэр 1 ост. нь. мүөтү, кыратык сылаас ууну кутан, булкуйуҥ. Бу мааска мырчыстаҕастары утары охсуһар.

2‑с ньыма. 1 ост. нь. илдьиритиллибит лүөн сиэмэтигэр 1 сымыыт үрүҥүн кутан, булкуйан баран, сирэйгэ биһэн, хаппытын кэннэ, сууйаҕыт. Бу мааска сирэйи тардар.

Угуттаныы

Ромашка, мээтэ, шалфей оттору булкуйан, 2–3 ост. ньуосканы ылан, 0,5 лиитирэ ууга кылгастык оргутуллар. Сиидэлээн баран, ыраас маарыланы хас да хос тутан, сылаас көөнньөһүккэ инчэтэбит уонна сирэйгэ, моонньуга уурабыт. Муннуга анаан хайаҕастыахха сөп. Сойбутун кэннэ, ылабыт. Бу курдук, иккитэ-үстэ оҥостуохха сөп. Бу мааска тириини уоскутар, эмтиир.

Кураанах тириини көрөргө-харайарга сүрүн быраабылалар:

Испиирдээх сириэстибэнэн, мыыланан сууйуллубат;

Күн аайы сиигирдэ, кириэмнии сылдьыллыахтаах;

Күнтэн, тымныыттан, тыалтан харыстыыр кириэми туттуллуохтаах;

Элбэх ууну иһиллиэхтээх;

Синтетика таҥастан, утуйар таҥастан аккаастаныллыахтаах;

Аһыйбыт үүт, кэпиир, суорат, бөлөнөх кураанах тириини үчүгэйдик ыраастыыллар, сымнаталлар.