СҮБЭҺИТ: Соботтон дьиҥнээх деликатес астыыбыт

Бүгүн биһиги  муҥха кэнниттэн сибиэһэй собобутуттан, олус минньигэс аһы астыахпыт. Амтанын хаһан да умнуоххут суоҕа. Аска барар бородууктата чэпчэки, онон чугас дьоҥҥутун күндүлүүргүтүгэр сүбэлиибит. Бу ырысыап азиатскайдыы истииллээх. 

Туох нааданый:  Собо, күөх лук, имбиир (сибиэһэйэ ордук), чосунуок, соевай соус, лимон сүмэһинэ (эбэтэр ириис уксуһа), бурдук, кыратык пиибэ, туус, биэрэс (амтанын көрөн).

Маринады оҥоробут. Бастаан күөх лук, имбиир уонна чосунуок ылабыт. Күөх лук аллараа үрүҥ өттүн маринадка, оттон үөһээ күөх өттүн киэргэтиигэ уурабыт. Имбиири, чосунуогу уонна биэрэһи кыра гына гына кырбаан, биир иһиккэ угабыт. Онно соевай соуһу уонна лимон сүмэһинин кутабыт. Элбэҕи кутумаҥ, аһары тууһуур туһата суох. Маринадпыт бэлэм.  Собону бэлэмниибит. Собону иһин-үөһүн ыраастаан баран хатырыктыыбыт. Балык сиһигэр тиийэ икки өттүттэн үгүстүк быһаҕынан кэрдии оҥоробут. Бу кэрдиилэр балык түргэнник маринадтаныытыгар уонна буһардаҕына кыра уҥуохтара суох буоларыгар көмөлөһөллөр. Ол кэннэ балыкпытын маринадпытынан үчүгэйдик сотобут. Өр маринадтыы сылдьыбакка эрэ, тута астыыр кыахтааххыт, тоҕо диэтэххэ, амтана буһарын тухары балыкка иҥиэҕэ. Балыгынан кэннэ куухуньаҕытын хомунан кэбиһиҥ. Ыһаарылыыбыт. Балык үрдүгэр баар маринад бөдөҥүн (лук, имбиир, чосунуок) илиигитинэн хомуйан ылаҕыт уонна бурдукка булкуйуҥ. Күүстээх уокка, хобордооххо арыы кутан,  хатырыктаныар диэри икки өттүттэн ыһаарылыыбыт. Буһарабыт. Балыкпытын эргитэн баран, 1-2 мүнүүтэ атын өттүн ыһаарылыыбыт, урут оҥорбут маринадпытын кутабыт. Онтон кыратык пиибэ кутан биэрэбит… Хаппаҕынан сабан баран, мөлтөх уокка 5-10 мүнүүтэ оргутабыт. Оо, хайдах курдук үтүөкэн сыта-сымара тахсарын сэрэйбэккит даҕаны! Балык олус нарын, амтаннаах буолар. Минньигэстик аһааҥ!