СҮБЭҺИТ: Собо кэнсиэрбэтэ

Собо кэнсиэрбэтэ оннооҕор кыбартыыра сылаас хоһугар 4-6 ый устата харайыллыан сөп. Маҕаһыын кэнсиэрбэтиттэн амтанынан туох да уратыта суох. Ырысыабынан араас помидору, болгарскай биэрэһи уонна туманы туһаныаххытын сөп.

Туох нааданый:

Орто собо балык — 4 уст.
Помидор — 8 уст.
Эриэппэ луук — 1 уст.
Чосунуок — 3-4 уст.
Мас арыыта — 50 мл.
Уксус 6%-наах — 2,5 ост.нь.
Түүс — 1 ч.нь.
Саахар — 0,5 ч.нь.
Хара биэрэс — 0,5 ч.нь.
Лавровай илиис — 3 уст.
Петрушка — 8 г.

Ырысыаба:

Балыгы ыраастыыбыт, ис буотараҕын хостуубут, хас биирдии балык иһин кичэйэн ыраастыыбыт. Балык төбөтүн, кутуругун уонна лапчааннарын быһабыт. Ууга сайҕаан ылан баран, тэҥ өлүүлэргэ кырбыыбыт. Дириҥник миискэҕэ быһыллыбыт балыгы угабыт. Помидору сууйан баран, сүрэҕин ылан быраҕабыт. Бөдөҥ кубиктыҥы гына быһабыт уонна балыгы кытта угабыт.

Луугу, чосунуогу ыраастыыбыт, саҥа күөх петрушканы кытары ууга сайҕаан ылабыт. Луугу төгүрүктүнү гына кырбыыбыт, чосуонугу эмиэ кыра гына кырбыыбыт, үлтүрүтүллүбүт петрушканы кытары миискэҕэ балыкка кутабыт.

Туустуубут, хара биэрэс, мас арыыта уонна уксус кутабыт. Барытын булкуйан баран 30 мүнүүтэ туруора түһэбит. Ол кэнниттэн казаҥҥа эбэтэр көстүрүүлэҕэ 50 мүнүүтэ кэриҥэ устата оргутабыт. Көрөн туран балык улахан уҥуохтарын ылан быраҕабыт. Бүтэһиккэ бааҥкалары стерилизациялыыбыт уонна лавровай илиистэри кутабыт. Собо балыгын бааҥкаларынан кутабыт уонна кэнсиэрбэли охсобут. Сойутабыт, ол кэннэ харайа уурабыт.

Соботтон кэнсиэрбэ олус минньигэс уонна сандалы остуолга хортуоппуйу кытта ууруллар. Минньигэстик аһааҥ!