СҮБЭҺИТ: Согажа дуу, чохочу дуу?

Тувиннарга согажа диэн бүлүүдэ баар. Барааны идэһэлэнэн баран, согажаны тута астыыллар. 

Бараан быарын кырбастаан, түргэнник арыыга ыһаарылаан ылаллар. Сиикэйдиҥи, сүмэһиннээх буолуохтаах. Бараан итир сыатын — иһигэр баар сиэккэ курдук сыатын саралаан ылан, быары суулуубут. Сииргэ табыгастаах буоларын курдук, кыра бэрэски курдук быһыылаах оҥоробут.

Туустаан, биэрэстээн баран, кыһыл чоххо үтэн, эбэтэр, аныгылыы гриль эрэһиэккэҕэ ууран, түргэнник  буһара охсон ылаллар. Сыата ууллан, быарга иҥэр. Согажаны итиилии сырдьыгынатан,  тута сииллэр. Тувиннар олус сөбүлүүр бүлүүдэлэрэ.

Бу согажа диэн сахалар чохочу диэн бүлүүдэбитигэр олус маарынныыр эбит. Ааттара да маарынныыр. Чохочу диэн эмиэ быары итир сыаҕа суулаан, аһаҕас уокка, чоххо үтэн буһарыллар бүлүүдэ. Онон бу түҥ былыргы биир уопсай үгэспит, төрүт аспыт сылдьар эбит.