СҮБЭҺИТ: Судургу, дьиэтээҕи соустар…

Ханнык баҕарар бүлүүдэни соус көмөтүнэн тупсарыахха сөп. Бүгүн онтон саамай судургу, дьиэтээҕи усулуобуйаҕа табыгастааҕын талан таһаарабыт.

Аатырбыт тартар соус

Туох ирдэнэр:

— сүөгэй (20%) – 100 г.,

— маринованнай оҕурсу (кыра) – 5-7 устуука,

— майонез – 100 г.,

— сибиэһэй укуруоп – 70 г.,

— чеснок – 2 өлүү,

— туус – ким төһөнү сөбүлүүрүнэн,

— хара мээккэ биэрэс.

Хайдах бэлэмниибит:

Сүөгэйдээх, майонезтаах иһиккэ блендэргэ эриллибит оҕурсуну, чесногу, укуруобу кутабыт, туус, биэрэс эбэн биир маасса буолуор диэри булкуйабыт. Бүттэ, аатырбыт тартар соус бэлэм. Бу соус хортуоппуйга, эккэ туох да ааттаах.

Чесноктаах соус

Туох ирдэнэр:

— сүөгэй (35% үөһэ) – 4-5 ост.нь.,

— соевай соус – 1 ост.нь.,

— ууллаҕас сыыр – 30 г.,

— чеснок – 2 өлүү,

— укуруоп – 1 ост.нь.,

— туус – ким төһөнү сөбүлүүргүнэн,

— хара мээккэ биэрэс – ким төһөнү сөбүлүүрүнэн.

Хайдах бэлэмниибит:

Сүөгэйгэ соевай соус, укуруоп, туус, биэрэс кутан баран булкуйабыт. Манна ууллаҕас сыыры уонна чесногу кыра түөркэҕэ түөркэлээн кутабыт. Бу соус ордук хортуоппуйга, эккэ барсар.

Шашлык соуһа

Туох ирдэнэр:

— томат паастата – 200 г.,

— уу – 200 мл.,

— чеснок – 4 өлүү,

— эриэппэ луук – 1 устуука (кыра),

— кинза, базилик – 100 г. (суох түгэнигэр укуруобунан солбуйуохха эбэтэр кыратык хаппыт туманы эбиэххэ сөп),

— хара сыттаах биэрэс – быһах төбөтүгэр,

— туус – ким хайдах сөбүүрүнэн.

Хайдах бэлэмниибит:

Кыра миискэҕэ уу, томат паастата кутан баран оргуйуор диэри булкуйа турабыт. Оргуйаатын кытта төһө кыалларынан бытархай гына кырбаммыт луугу, чесногу, күөх туманы барытын кутан, туус, биэрэс эбэн баран 3-5 мүн. тэптэрэн ылабыт. Маннык соуһу сойутан баран шашлыкка эрэ буолбакка, ханнык баҕарар чоххо буспут эти кытта сиэххэ сөп.

Үүттээх соус

Туох ирдэнэр:

— үүт – 1,5 ыст.,

— ынах арыыта – 2 ост. нь.,

— маҥан бурдук – 1 ост. нь.,

— туус – ким төһөнү сөбүлүүрүнэн.

Хайдах бэлэмниибит:

Арыыны хобордооххо кутан уулларабыт, үрдүгэр бурдук кутан булкуйабыт уонна булкуйарбытын тохтоппокко оргуйбутунан итии үүтү кутабыт, туус эбэбит. Кыратык тэптэрэ түһэн баран араарабыт.

Сөбүлүүр дьон бытархай гына кырбаан укуруоп эбиэн сөп. Куурусса бүлүүдэлэрин кытта сииргэ, соуска өтөх тэллэйин ыһаарылаан, блендарга эрийтэрэн кутар өссө минньигэс.