СҮБЭҺИТ: Сүбүөкүлэ сэбирдэҕиттэн кэтилиэт

Сүбүөкүлэни хостоотоххутуна, эбэтэр сэбирдэхтээх эдэр сүбүөкүлэни атыыластаххытына, сэбирдэҕин быраҕымаҥ. Онтон олус минньигэс кэтилиэттэри бэлэмниэххэ сөп. Кэтилиэт аппетиты көтөҕөр уонна доруобуйаҕа туһалаах. Маннык кэтилиэттэри сүмэһини эбэтэр бэйэҕит сөбүлүүр атын соускутун кытта булкуйан сиэххэ сөп. Бу кэтилиэттэри оҕолор кытта астына сииллэр.

Наада буолар:

• Сүбүөкүлэ сэбирдэҕэ — 20-чэ устуука;
• Эриэппэ луук — 1 уст.;
• Чосунуок — 2–3 өлүүтэ;
• Куурусса сымыыта — 2 уст.;
• Бурдук — ыстакаан аҥаара ;
• Туус, мэлиллибит хара биэрэс;
• Мас арыыта — ыһаарылыырга.

Сүбүөкүлэни сэбирдэҕин сууйуҥ, куурдуҥ уонна кыра гына кырбааҥ. Луугу уонна чосунуогу ыраастаан, кыра гына кырбааҥ. Кырбаммыт сүбүөкүлэ сэбирдэҕин, луугу уонна чосунуогу иһиккэ кутан холбооҥ. Сымыыттары кутуҥ, туустааҥ, биэрэстээҥ уонна булкуйуҥ. Булкуйа-булкуйа, хойуу буолуор диэри бурдугу кыра-кыралаан кутуҥ. Арыылаах итии хобордооххо ньуосканан уурталаан, кэтилиэттэри оҥоруҥ. Икки өттүттэн ыһаарылааҥ.

Минньигэстик аһааҥ!