СҮБЭҺИТ: Сүбүөкүлэттэн икра астыыбыт

Сүбүөкүлэттэн икраны бутербродка биһэргэ эбэтэр сокууска быһыытынан амсайыахха сөп. Тымныытыгар сүбүөкүлэ икрата олус бэртээхэй. Ону таһынан, амтанын тупсарарга уонна чаҕылхай хараҥа кыһыл өҥүн иһин, борщ мииҥҥэ кутуохха сөп. Бу түгэҥҥэ икраны микроволновкаҕа сылытан баран, оргуйа турар мииҥҥэ кутан, булкуйуохха сөп.

500 мл 3 бааҥка сүбүөкүлэ икратын астыырга наада:

• сүбүөкүлэ — 1 кг;
• помидор — 1 кг ;
• эриэппэ луук — 500 г ;
• моркуоп — 500 г ;
• чосунуок — 5 өлүү (25 г) ;
• мас арыыта — 180 мл ;
• иһэр уу — 120 мл;
• дьаабылака уксууһа — 100 мл ;
• саахар — 1 о. нь.;
• мэлиллибит мускатнай эриэхэ — быһах төбөтүнэн;
• саҥа мэлиллибит хара биэрэс, туус.

Луугу ыраастаан баран бытархай гына кырбааҥ. Моркуобу уонна сүбүөкүлэни ыраастааҥ, сууйуҥ уонна улахан теркаҕа аалыҥ. Чосунуогу ыраастаан кырбааҥ. Икраҕа анаммыт помидордары сууйуҥ уонна хас биириин  быһаттааҥ. Оргуйа турар ууга 1 мүнүүтэҕэ угуҥ. Шумовканан дуршлагка таһааран ууруҥ, онтон хаҕын ыраастааҥ. Блендеринэн ньыһыйыҥ. Дириҥ хобордооххо 2 ост. нь. мас арыытын ититэн, орто уокка булкуйа-булкуйа луугу, чесногу кытта кытарчы ыһаарылааҥ. Теркаламмыт моркуобу уонна сүбүөкүлэни кутуҥ. Булкуйа-булкуйа орто уокка 7 мүнүүтэ ыһаарылааҥ. Оҕуруот астаах хобордооххо бытархайдаммыт помидордары уган, барытын бииргэ 5 мүнүүтэ буһарыҥ. Дьаабылака укусуһун, ууну, ордубут мас арыытын кутуҥ уонна намыһах уокка 30 мүнүүтэ буһарыҥ.  Саахары кутуҥ. Сүбүөкүлэ икратын амтанын көрөн туустааҥ уонна биэрэстээҥ. Мускатнай эриэхэни кутуҥ, орто уокка өссө 5 мүнүүтэ кэриҥэ тутуҥ.  Өскөтүн икра сүмэһинэ убаҕас буоллаҕына, 5–10 мүнүүтэ устата ордук уутун көтүтүҥ. Оҕуруот аһа түгэҕэр сыстыбатын диэн булкуйаргытын умнумаҥ. Сүбүөкүлэ икратын кураанах, ыраас бааҥкаларга кутуҥ. Оргуйа турар ууга 15 мүнүүтэ стерилизациялааҥ. Сойбутун кэннэ кураанах, сөрүүн сиргэ ууруҥ.

Остуолга ууруох иннинэ сүбүөкүлэ икратын бытархайдаммыт грецкэй эриэхэни уонна күөх сибиэһэй укробу кутуохха сөп.