СҮБЭҺИТ: СЫЛГЫНЫ ИИТИИГЭ СҮБЭ-АМА

Сылгыны иитиигэ биэ да, атыыр да буоллаҕына, түүтэ куобах ньуолах, таныыта киэҥ, хараҕа толору, кэтит түөстээх, үүттээх биэттэн төрөөбүт кулунчук буолуохтаах.

Убаһаны киэҥ далга оту ходуллаабат гына, тоҥмотун учуоттаан күҥҥэ кыра-кыратык үстэ, киэһэтин 11 чаас саҕана аһаттахха, убаһа титирээбэт.

Хаһан да эбиэһи сиргэ мээнэ кутан аһатымаҥ, миэтэрэ үрдүктээх хоруудаҕа кутуҥ. Эбиэскит суох буоллаҕына, нэчимиэн бурдугу биэримэҥ, сылгы куртаҕа биир хаамыралаах буолан, нэчимиэн бурдук үллэрин убаһа тулуйбат, өлүөн сөп.

Эбиэс бурдугу төрүүр биэлэр хоруотуулларын кытта биэрэн бүтэҕит. Биэ икки кэнники ыйга оҕото түргэнник ийэтин иһигэр улаатар. Ол кэннэ эбиэһинэн аһаттахха, биэ оҕото олус улаатан, кыайан төрөөбөт. Убаһаны, биэни аһатар сиргэ 2 м үрдүккэ мөһөөччүккэ тууһу баайаҕын эбэтэр охто сытар тииккэ хорууда хаһан тууһу кутаҕын.

Саха ыалын халандаарыттан, 2025 с.

«Айар» кинигэ кыһата.

Сылгыны иитиигэ сүбэни-аманы өссө манна көрүөххэ сөп: https://sakha-sire.ru/saha-sylgytyn-iitiige-10-sybe-ama/