СҮБЭҺИТ: Сымыыты уратытык кырааскалыыбыт

Пасха бырааһынньыга буолара чугаһаата. Элбэх ыаллар сымыыттары кырааскалыыллар, куличтары буһараллар. Сымыыты уратытык, кыраһыабайдык хайдах кырааскалыахха сөбүй?

Сымыыты кырааскалыырга хиимийэлээх кырааскалары туһаммат ордук, тоҕо диэтэр, сымыыкка бэйэтигэр киириэн сөп. Онон бородууктаттан ылыллыбыт кыраасканан кырааскалыыбыт.

Тимир көстүрүүлэҕэ 1 лиитэрэ тымныы ууну кутабыт, сымыыттары угабыт. 1 ост.нь. куркуманы, 2-3 ытыс каркаде чэйи кутабыт. 10-15 мүнүүтэ оргутабыт уонна уотун арааран баран, 15-20 мүнүүтэ устата ууга хаалларабыт.

Ууттан таһааран баран, сойбутун, куурбутун кэннэ, илиибитин сымыыт үрүҥүнэн биһэн баран, поталь диэн көмүс фольганы ылан, сымыыты бүрүйэбит, илиибитинэн имэрийэбит. Поталь көмүһэ сымыыт хаҕар сыстан хаалар.

Сырдык от күөҕэ, оливковай өҥнөөх, кыһыл көмүс кылабачыгастаах, олус кыраһыабай сымыыттар буолан тахсаллар. Пасха бырааһынньыгар ханнык баҕарар остуол киэргэтэр кыахтаахтар.