СҮБЭҺИТ: Сүрэҕи саататар сайыҥҥы баклажаннаах салаат

Бу салааты биирдэ амсайбыт киһи умнубат, астына-дуоһуйа сиир аһа. Сайыҥҥы чэпчэки, ол эрээри тотоойу уонна дьикти амтаннаах салаат ырысыабын кытта «Вкусная шкатулка рецептов» Вконтакте ханаалга үллэһиннилэр. Сымнаҕас помидору кытта дэбигис буспут баклажан дьүөрэлэһиитэ кими баҕарар сөхтөрүө.

Туох нааданый? Баклажан – 1 орто кээмэйдээх. Кукуруза крахмала – 2-3 улахан ньуоска, черри помидор – 10-15 устуука (көннөрү помидору эмиэ туттуохха сөп). Салаат сэбирдэҕэ – биир тутум (пучок). Сымнаҕас сыыр (творожный или сливочный) – 100 гр, соевай соус – 2-3 улахан ньуоска, чеснок – 1-2 тиис (долька), сытыыны сөбүлүүр буоллахха. Петрушка эбэтэр кинза. Кинза бу салаакка ордук барсар, азиатскай амтаны биэрэр. Туус, биэрэс.  Ыһаарылыырга аналлаах мас арыыта.

Хайдах астыыбыт?

1. Баклажаны бэлэмниибит. Баклажаны сууйан, кубиктыы быһабыт (2х2 см кэриҥэ). Дириҥ иһиккэ уган баран, крахмалынан ыһабыт уонна хас биирдии кубик бүрүллэрин курдук үчүгэйдик булкуйабыт. Крахмал баклажаҥҥа кыраһыаба хаҕы үөскэтэр уонна арыыны элбэҕи иҥэриннэрбэт.

2. Ыһаарылыыбыт. Хобордооххо бэлэмнээбит баклажаннарбытын кыһыл көмүс өҥнөнүөр диэри, 2-3 мүнүүтэ, бары өттүттэн эргитэ сылдьан ыһаарылыыбыт. Ыһаарыламмыт баклажаннары кумааҕы сотторго ууран, ордук арыытын иҥэртэрэбит.

3. Атын ингредиеннэри бэлэмниибит. Помидордары икки аҥы быһабыт. Петрушка/кинза уонна чесногу бытарыта кырбыыбыт.

4. Салааты хомуйабыт. Дириҥ тэриэлкэҕэ салаат сэбирдэхтэрин уурабыт, үрдүнэн помидордары, сыыры ыһабыт. Үрдүгэр итии, дырылыы-барылыы сылдьар баклажаннары кутабыт.

5. Соус кутабыт. Соевай соуска бытарытыллыбыт чесногу, наада буоллаҕына кыра тууһу, биэрэһи эбэбит. Бу соуспутунан салааппытыгар  кутабыт уонна кырбаммыт отунан киэргэтэбит.

Өссө минньигэс оҥорор баҕалаах буоллаххытына, соуска кыра мүөтү эбэтэр бальзамическай уксууһу эбиэххитин сөп. Бу салааты остуолга ууруох иннинэ эрэ оҥорор ордук. Өр турдаҕына баклажан сымныыр.