СҮБЭҺИТ: Тэллэйтэн судургу бүлүүдэлэр…

Бу судургу бүлүүдэлэри астыырга элбэх бириэмэ бараммат, ураты экзотическай бородуукталар ирдэммэттэр.

Тэллэй миинэ

Дьон-сэргэ ордук сөбүлээн астыыр ырысыаба. Бастаан тэллэйдэри арыыга ыһаарылыыбыт, онтон эмиэ оннук ыһаарыламмыт луугу, моркуобу кытта холбуубут. Тэллэйгэ сүөгэй амтана олус барсар, онон биир толору ньуоска хойуу сүөгэй бу дьикти миини өссө тупсаран биэрэр. Биллэн турар, саамай минньигэс миин сибиэһэйдии хомуллубут ойуур тэллэйиттэн оргутуллар, ол эрээри куурдуллубуттан да куһаҕана суох буолар – мииҥҥэ сыты-сымары биэрэллэр, оттон хойуу гынарга сылы эргиччи баар шампиньону да туһаныахха сөп.

Туой иһиккэ буспут тэллэйдээх куурусса этэ

Туой иһиккэ намыһах кыраадыска бытааннык буһарыллан, тэллэйдэр бэйэлэрин сүмэһиннэринэн кууруссаҕа иҥэллэр, оттон куурусса, бэйэтин уочаратыгар, сүмэһинин хортуоскаҕа биэрэр. Тимьянтан уонна чосуонуоктан минньигэс сыт тахсар, оттон чөчөгөй уонна сыыр бары амтаны бииргэ холбууллар. Туой иһиккэ буспут тээллэйэ олус минньигэс буолар. Өссө биир сүбэ: ыалдьыттар кэлэллэригэр сибиэһэй аһы түргэнник бэлэмниир туһугар, кууруссалаах тэллэйи кытта эрдэттэн ыһаарылаан, өлүүлээн тоҥорон кэбиһиэххэ сөп. Ириэрдэххэ амтана сүппэт.

Сибиэһэй тэллэйтэн уонна өҥнөөх хаппыыстаттан сылаас салаат

Өҥнөөх хаппыыста – ураты оҕуруот аһа. Бүгүн эрэстэрээннэргэ бу оҥуруот аһын араастаан туһаналлар: пицца тиэстэтин оннугар, итиэннэ биир аныгы эрэстэрээн хаппыыста курдук быһыылаах чизкейк оҥорор. Бу ырысыапка, биллэн турар, барыта судургу. Клярга миккиллэн ыһаарыламмыт хаппыыста сибэккилэрэ ыһаарыламмыт шампиньоннары кытта булкуһан, тэллэй амтаныгар дьүөрэлэһэллэр. Оттон грецкэй эриэхэлэр, интэриэһинэй хартыыһалаах соус уонна от-мас бу судургу салааты өссө минньигэс оҥорор.

Тэллэй паштета

Сайынын ханнык баҕарар ойуур тэллэйин, холобур, хатыҥ анныгар үүнэр тэллэйиттэн эбэтэр мас тэллэйиттэн паштет оҥоруохха сөп. Бу тэллэйдэр мииҥҥэ дьадаҥытык уонна харааран көстөллөр, оттон паштекка олус үчүгэй буолаллар. Кыһын шампиньону кырбыырга сүбэлиибит уонна кыаллар буоллаҕына, кофемолкаҕа куурдуллубут үрүҥ тэллэйи мэлийэн баран, тума курдук кутан биэриэххэ сөп. Оччоҕо паштекка ураты минньигэс амтаны биэрэр. Тэллэй бытархай кырбастара үүт, сүөгэй уонна арыы көмөтүнэн биир кэлим, нарын паштет маассатыгар кубулуйаллар.