Сүбэһит: Тоҥорон хаһааныы

Биһиги оҕуруот аһын хатаран, туустаан уонна кэнсиэрбэлээн эрэ хаһаанар үгэстээхпит.  Уһук  Хотугу дойдуга олорор эрээри уһун уонна тымныы кыһыммытын төрүт туһаммаппыт. Оттон арҕааҥҥы омуктар оҕуруот аһын араастаан тоҥорон хаһааналлар эбээт. Дьиҥинэн итиннэ туох даҕаны киһи кыайбата, сатаабата диэн суох. Тоҥоруллубут оҕуруот аһа, тума үүнээйи  иҥэмтэлээх эттиктэрин төрүт сүтэрбэттэр. Тоҥорон хаһаанары дьиэҕэ-уокка маннык оҥоруллар:

Оҕурсуну салпыакканан суулаан полиэтилиэн бакыакка уган, холодильникка икки-үс нэдиэлэ устата сибиэһэйдии харайыллар.
— Сибиэһэй оҕурсуну, чиҥ эттээх помидору кырбаан кураанах өрбөххө сытыаран уутун оботторуллар. Дьоҕус бакыаттарга угуталаан мас арыытын таммалатан булкуйуллар. Морозильникка угуллар. Кыһын аска туттуллар.
— Тума буолар күөх үүнээйилэри бэйэтинэн эбэтэр кырбаан баран оливка арыытыгар булкуйан формочкаларга кутан тоҥоруллар.
— Моркуобу теркалаан, минньигэс биэрэһи уонна помидору кыра гына кырбаталаан укуруобу, луугу кытары булкуйуллар. Итиэннэ биирдэ туттуллар полиэтилиэн (100, 200 уонна 250 грамнаах) иһиттэргэ кутан тоҥорон кэбиһиллэр. Сайыны санатар оҕуруот аһын булкааһыгын кыһын ханнык баҕарар бүлүүдэни бэлэмниир гэ туһаныллар.
— Кыһын ириэрэн симии бүлүүдэни бэлэмнииргэ анаан Болгария биэрэһин сиэмэтин ылан баран салапаан бакыакка уган тоҥоруллар.
— Биэрэһи тоҥоруу иккис ньымата: помидору кытары холбуу эрийэн, бытархай гына кырбаммыт күөх тумалары, луугу уонна чочунааҕы эбэн булкуйан баран ыстакаанчыктарга
тоҥоруллар. Ириэрэн борщка, рагуга кутуллар.

Өйдөөҥ:

— Тоҥорорго хайаан да сибиэһэй уонна сиппит оҕуруот аһын талыллар. Кичэйэн сууйуллар, куурдуллар.
— Иһиккэ (контейнерга, салапааҥҥа) кутан салгын уонна сиик быыһылаабат гына ыга хаппахтанар.
—  Дьоҕус буорсуйаларынан тоҥоруллар. Ити утарынан туттарга биирдии өлүүскэнэн ыларга табыгастаах