Сүбэһит: туоһу сөпкө хастыырга үөрэнэбит

Туос хастанар кэмэ — бэс ыйын ортотуттан от ыйын ортотугар диэри. Бу кэмҥэ уута сүүрэн бүтэр, туоһа үчүгэйдик хастанар буолар. 

Ардаҕа суох куйаас күҥҥэ хастаатахха, туос дөбөҥнүҥ хоҥнор. Дьон олорор сириттэн тэйиччи, үрэх хахха, күлүктээх, булкаастаах ойуур быыһыгар үүнэр хатыҥтан хастыыбыт. Маннык сир хатыҥа көнө, туоһа ыраас, сөп халыҥнаах буолар. Орто саастаах хатыҥ туоһа ордук табыгастаах.

Бастаан хатыҥ аттыгар тиийэн, сиэри-туому толоруллар. Алаадьы ууран баран, сир иччититтэн, хатыҥтан ботугураан көрдөһүллэр, көрүлээн буолбакка, наадаҕа ылабыт диэн көҥүл ылыллар.

Сытыы саха быһаҕынан туруору уонна сытыары көнө сурааһыннары суоллаан баран, туоһу сэрэнэн хоҥуннаран ылыллар.

Иһиккэ эрдэттэн туойу ууга суурайан, илдьэ кэлэн баран, хастаабыт сири сотуллар. Оччоҕо хатыҥ  сүмэһинэ сүүрбэт, түргэнник оһорунар, харыстыыр хах үөскүүр.

Хастаммыт туоһу дьиэҕэ аҕалаат, хатарбакка таҥастыыр ордук. Тас үрүҥ субатын губканы инчэтэн баран, ньиккэрийэн сотуллар. Куобах уостарын (хара ойуутун) ыраастыыбыт. Таҥастаммыт туоһу наардаан, хардары-таары дьаарыстаан баран, сииктээх, сөрүүн сиргэ ыарахан ыйааһынынан баттатабыт.

Маннык харайыллыбыт туоһу 3 сыл устата туттуохха сөп.

«Туоска, тириигэ штампанан ойуу түһэрэн оҥоһук оҥоруута» кинигэттэн.