СҮБЭҺИТ: Убаһа тыҥатын астыыбыт

Астыыр ньыма уустуга суох. Бүгүн убаһа тыҥатын астыырга судургу ырысыабы кытта үллэстэбит.

Туох нааданый: сүөгэй,  томат-пааста, эриэппэ луук, хара биэрэс туорааҕа, лавровай сэбирдэх, туус, тума.

Сылгы тыҥатын бөдөҥ тымырдартан эрдэттэн ыраастаан баран, чараастык кырбастыыбыт. Тыҥаны ыраас, тымныы уунан саба кутан, икки чаас устата туруорабыт. Ол кэннэ тыҥаны көстүрүүлэҕэ уган, оргутан баран, чаастан итэҕэһэ суох буһарабыт. Эриэппэ луугу аҥардыы төгүрүктээн кырбаат, дириҥ хобордооххо уган, арыыга ыһаарылыыбыт. Онтон тыҥаны уган, өссө арыы эбэн биэрэн, кэмиттэн кэмигэр булкуйа-булкуйа салгыы буһарабыт. Ол кэннэ сүөгэйи, оттон томат-паастаны, тууһу, туманы эбэн, булкуйабыт. Тимьян эбэтэр базилик эбиэххэ сөп, ол эрээри булгуччулаах буолбатах. Ыһаарыламмыт тыҥаҕа соус кутабыт, лавровай сэбирдэҕи, биэрэһи кутан, наада буоллаҕына өссө туустуубут. Хаппаҕынан сабан, уоту олох кыра гына намтатан сыта-сымара ааһарын курдук 10-18 мүнүүтэ туруорабыт. Барыта бэлэм. Остуолу тардан, ыалдьыттары ыҥырабыт. Минньигэстик аһааҥ!