СҮБЭҺИТ: Уоһахтан сыыр астыыбыт

Социальнай ситимнэринэн Валерий Федоров уоһахтан сыыр оҥоруу ырысыабын видеота тарҕанна. Сыыр оҥоруу ньымата олус судургу.

Уоһах диэн ынах төрөөбүтүн кэннэ бастакы күннэргэ ыан ылыллар үүт, саһархай өҥнөөх, туспа амтаннаах, олус элбэх битэмииннээх буолар.

Ырысыаба:

* Уоһах;
* Амтаныгар сөп түбэһиннэрэн туус эбиэххитин сөп;
* Барытын үчүгэйдик булкуйабыт;
* Астыыр иһиккитин мас арыытынан соттуохха;
* Духуобкаҕа 160 кыраадыстаах температураҕа эргитэ сылдьан 50 мүнүүтэ устатаа буһарабыт;
* Буспутун кэннэ сөрүүн сиргэ, холодильникка түүн устата туруорабыт;
* Сарсыарда эрдэ туран минньигэс, олус туһалаах сыыры амсайыҥ.

Саха сиригэр уоһаҕы түҥ былыргыттан араас аһы астыыллара. Уоһах киһи организмыгар олус туһалаах, иммунитеты бөҕөргөтөр, араас битэмиининэн баай буолар. Онтон сыыр эмиэ олус туһалаах, иҥэмтиэлээх аһылыгынан буолар. Бу олус судургу ырысыабы тускутугар туһаныҥ уонна дьиэ кэргэҥҥитин минньигэс, ураты аһынан күндүлээҥ!