СҮБЭҺИТ: Кабачок үүнүүтэ бытаарбыт буоллаҕына…

Кабачок аһын биэрбэт буолла, сибэккитэ аҕыйаата дуо? Бу — кабачогу сайын сөпкө аһатар кэм кэлбитин бэлиэтэ. Куйаас кэмҥэ уонна күүскэ ас биэрэр кэмигэр үүнээйи буортан иҥэмтэлээх эттиктэри икки бүк күүскэ ороскуоттуур. Биһиги бүгүн хайдах кабачогу сөпкө уонна куттала суох аһатан, биэдэрэнэн үүнүүнү ылар туһунан кэпсиэхпит.

Кабачок аһатыыга наадыйбыт бэлиэлэрэ:

• Саҥа сэбирдэхтэрэ бытааннык үүнэллэр;
• Сибэккилэрэ кыралар, мөлтөхтүк сайдаллар, хаталлар;
• Сэбирдэхтэрэ, ордук аллараа өттө, өҥүн сүтэрэн араҕастыйар;
• Астара бытааннык улааталлар;
• Ас төбөтүгэр сытыйыы бэлиэтэ үөскүүр.

Сыыс от көөнньөһүгэ – азотунан уонна микроэлеменнарынан баай суурадаһыны бэлэмнээһин

Бу ньыма азотунан уонна араас микроэлеменнарынан баай, үүнээйигэ олус туһалаах. Буочуканы үс гыммыт иккитигэр (2/3) сыыс отунан толоробут уонна  уу кутабыт. Биир ытыс күл уонна 1-2 остолобуой ньуоска саахары (бу көөнньөрүүгэ көмөлөһөр) эбэбит. Буочука үрдүн сабан баран, күүгэнэ бүтүөр диэри 7-10 күн устата көөнньөрө уурабыт. Ити кэннэ лиитэрэ көөнньөһүгү 10 лиитэрэ ууга суурайабыт.  Хас биирдии умнас анныгар 1-2 лиитэрэни хайаан да ардах кэнниттэн эбэтэр уу куппутун кэннэ кутабыт. Кураанах буорга кутар көҥүллэммэт, умнаһын сиэн кэбиһиэн сөп.