Сыдьаайа 20 сыллаах үлэтин сөҕө-махтайа көрдүбүт

Биир сааскы ылааҥы күн, кулун тутар 18 күнүгэр, Өксөкүлээх Өлөксөй аатынан норуоттар доҕордоһууларын дьиэтигэр «20 сыллаах үҥкүү Сыдьаайа» диэн олус кэрэ кэнсиэр буолла.

Анастасия Габышева-Сыдьаайа айар үлэтин 20 сыллаах кэнсиэрин «Саха» НКИХ эрэдээктэрэ, ырыаһыт Аскалон Семенов иилээн-саҕалаан ыытта.
Кэнсиэр саҕаланыыта Сыдьаайа бэйэтэ айбыт ырыатынан дьонун уруйдаата-айхаллаата. Онуоха кини аттыгар Сахабыт сирин сайынын санатан, сыанаҕа сибэкки курдук кэрэ аҥаардар кутулла түстүлэр. Сахалыы ырыаҕа саймаархай нарын үҥкүүнү көрөр олус да кэрэ эбит!
Сыдьаайа 2005 сыллаахха тэрийбит, ылсыбыт үлэтин хатыламмат үҥкүүлэринэн көрдөрбүтүттэн көрөөччүлэр туран эрэ тэҥҥэ үҥкүүлэһэн ыллылар. Бука бары өрө көтөҕүллэн, үс чаас  устата кэнсиэри сөҕө-махтайа көрдүлэр.

Аны 22 үҥкүүгэ барытыгар ураты көстүүмнэрэ сөхтөрдө. Сыанаттан араас дойду тыына, тэтимэ кэлэргэ дылы буолла.
Салайааччылара Анастасия Габышева-Сыдьаайа үҥкүүһүттэригэр куруук бэйэтинэн холобур буолар. Эчи кэрэтэ, намчыта, дьонугар сыһыана, кырдьык да Сыдьаайа!

Кэргэнэ Аркадий Иванов, сиэн кыыстара,  аймахтара  күндү киһилэрин сыралаах үлэтигэр күүс-көмө буолаллар, өйүүллэр, тэҥҥэ сылдьан үөрүүлэрин-көтүүлэрин көрөөччүлэри кытары үллэстэллэрэ үөртэ.

Сыдьаайа бөлөхтөрүгэр сааһыттан тутулуга суох,  мэлдьи кэрэ буолуон баҕарар, хамсана-имсэнэ сылдьан олохторун уһатыан уонна наар кэрэ эйгэтигэр кыттыһыан баҕалаахтар үөрэ-көтө дьарыктаналлар. Бэл, 85 саастаахтар үҥкүүлүүр кыахтаахтарын көрөн итэҕэйдибит. Хаһан да үҥкүүлээбэтэх дьону сыанаҕа таһааран үҥкүүлэтии, муусуканы таба талыы, сыанаҕа туттарга-хаптарга үөрэтии элбэх үлэни, сыраны, тулууру, дьулууру эрэйэр эбээт.
Сыдьаайа, сыралаах үлэҥ үрдүктүк сыаналана турдун, куруук үөрэ-көтө сылдьарыҥ, олох кыһалҕаларын чэпчэкитик аһарынар күүһүҥ миэхэ холобур буолар. Эдэрдии эрчимҥин ыһыктыбакка инниҥ диэки дабайан иһэргэр. Айар кииниҥ үлэтэ сайда, үүнэ, чэчирии турдун!

Валентина МОХОВА