“Сыдьаайалар” бэстибээлтэн кэллилэр

Алтынньы ыйга “Сыдьаайа” айар киинин үҥкүүһүттэрэ  ыраах Турция сиригэр тиийэн, аан дойдутааҕы бэстибээлгэ Арассыыйа аатыттан кыттан, бастакы үрдэли ылан ситиһиилэнэн кэллилэр.

Салайааччы, Саха Өрөспүүбүлүкэтин  култууратын туйгуна Анастасия Габышева-Сыдьаайа маннык кэпсээтэ:

-Бу саас Москуба куоракка Кириэмил бастыҥ дыбарыаһыгар ыытыллыбыт аан дойдутааҕы бэстибээлгэ кыттыбыппыт. Онно анаан туруорбут үҥкүү-айымньыбын дьүүллүүр сүбэ сэргээн,  Кылаан чыпчаалы (Гран-при) анаабыта уонна бэстибээл успуонсардара Стамбул куоракка буолар бэстибээлгэ харчынан сэртипикээт туттарбыттара.

Онон олус үчүгэйдик кыттан, дойдубут кэрэ үҥкүүтүнэн кэрэхсэтэн, эбиитин муораҕа сөтүөлээн сынньанан, астынан кэллибит.

Сиэммин Сыдьаайа Куону кыра эрдэҕиттэн сыанаҕа таһааран бэйэбин кытта үҥкүүлэппитим ыраатта, бэйэтэ баҕаран туран батыһарын сөбүлүүр. Омук сирин көрөн, мин эмиэ омук эбиппин диэн  өйдөөн кэллэ. “Биһиги эмиэ туспа тыллаахпыт, ону олох сүтэримээр” диэн быһаарабын. Онно тиийэн күнүн көрөн уларыйбат эбит диэн сөхтө, арай ый аҥаара атыннык сытарын көрөн соһуйда. “Күн уларыйбат, ол курдук эн эмиэ араас түгэннэртэн бэйэҕин сүтэримээр” диэн кэпсэтэбин.  Итинник  кэпсэтиигэ кыра да буоллар, син өйдөөбүт курдук чоҕулуччу көрүтэлиир.

Биир үҥкүүһүтүм эмиэ сиэнин илдьэ барбыта, инньэ гынан,  иккиэн дьүөгэлэһэн үчүгэйдик сырыттылар.

Үҥкүүһүттэрим «Дьол мичээрэ» уонна «Чороон»  бөлөхтөрбүттэн барсыбыттара. Барыларыгар дьарыкпар сылдьан, араас сыаналарга, араас дойдуларга тиийэ мин айымньыларбын үҥкүүлээн арыйан көрдөрөллөрүгэр махтанабын, ситиһиибитинэн уруйдуубун.