Сүөһүгэ эмиэ битэмиин наада

Бүлүү улууһун Кыргыдайдааҕы бэтэринээринэй учаастак бэтэринээринэй биэлсэрэ Виталий Иванов «Кыргыдай» ТХПК сүөһүлэрин уһун кыстык иннинэ битэмииннэринэн хааччыйда.

Сүөһү эмиэ битэмииҥҥэ наадыйар. Үгүс дьон ону аахайбат. Битэмиинэ тиийбэт ньирэй куһаҕаннык улаатар, ыалдьыан, бэл, өлүөн да сөп. Сорох пиэрмэрдэр мэччирэҥҥэ сылдьар сүөһү битэмииҥҥэ наадыйбат дии саныыллар.

Ол эрээри, ордук кыһыҥҥы, сааскы кэмҥэ ханнык баҕарар сүөһүгэ битэмиинэ тиийбэт буолар. Аны туран, мээнэ биэрэр эмиэ сатаммат. Сүөһүгэ битэмиини бэтэринээр ааҕан-суоттаан, туругун көрөн-истэн баран, биэриэхтээх. Битэмиин сүөһү иммунитетын күүһүрдэр, ыарыыттан да харыстыыр.

Ордук улаатар ньирэйдэргэ уонна төрүөхтээх ынахтарга битэмиин хайаан да наада диэн Бэтэринээрийэ департамена иһитиннэрэр.