Сүгэни быраҕыыга Диана Павлова рекорд олохтоото

Алдан оройуонун Хатыстыырыттан сылдьар 20 саастаах Диана Павлова сүгэни быраҕыыга Саха сирин рекордун олохтоото. Кини сүгэтин 116 миэтэрэ ыраахха бырахта.

Бу күннэргэ Дьокуускайга хотугу многоборьеҕа норуот хаһаайыстыбатын үтүөлээх үлэһитэ Виктор Ефимов сырдык кэриэһигэр Уһук Илин, Сибиир, Урал уонна Хотугулуу-Арҕаа федеральнай уокуруктар чөмпүйэнээттэрэ буола турар. Барыта 52 спортсмен кытта сылдьар.

Многоборецтар балаҕан ыйын 21-24 күннэригэр ыстаҥаҕа, паалкалаах сүүрүүгэ, сүгэни быраҕыыга, аркааны хорейга быраҕыыга уонна наартаны ойууга күрэхтэһиэхтэрэ.