Сыл аҥарыгар тимир суолунан 182 тыһыынча киһи айаннаата

Аллараа Бэстээх ыстаансыйатыттан пассажирдары таһыы 2019 сыл от ыйын 27 күнүттэн саҕаламмыта, номнуо түөрт сыл ааһа охсубут. Саха сирин олохтоохторо тимир суолунан сылдьарга үөрэнэн эрэллэр.

Бу туһунан «Саха сирин тимир суоллара» хампаанньа иһитиннэрэр.

Бүгүн Дьокуускай куораттан Аллараа Бэстээх – Благовещенскай, Аллараа Бэстээх – Владивосток уонна Аллараа Бэстээх – Иркутскай хайысхаларынан тиийэ Уһук Илин уокурук ханнык баҕарар куораттарыгар тиийэр кыахтаахтар. Дьокуускай куораттан пассажирдары Аллараа Бэстээх тимир суолун ыстаансыйатыгар диэри массыынанан эбэтэр уу суолунан тириэрдэллэр.

2019 сылы кытары тэҥнээтэххэ, поеһынан айаннааһын үс төгүл улаатан уонна 2022 с. 286 тыһыынча киһиэхэ тиийбитэ. Оттон быйыл сыл аҥарыгар 182 тыһыынчаттан тахса киһи таһылынна, ол ааспыт сыл бу кэминээҕэр 45% улахан.