Сыл бэлиэтэ — туойунан бэлэх

Бу күннэргэ Саҥа дьылы көрсө Горнай улууһун Бэрдьигэстээҕэр «Күбэйэ» туой оҥоһук арт-устуудьуйа хаһаайкалара  «Эйэ»  түөлбэ олохтоохторугар үүнэр сыл хаһаайына Дьөһөгөй ойуулаах талисман бэлэхтэри оҥорууга маастар-кылаас тэрийдилэр.

“Устуудьуйа хаһаайкалара Даайа Моруот, Нина Саввина бэлэхтэри оҥорууга бэлэм туойтан анал матырыйаалынан хааччыйдылар, ыйан-кэрдэн, сүбэлээн-амалаан биэрдилэр. Иһирэх кэпсэтии быыһыгар олус диэн кэрэ бэлэхтэри оҥостон, «Эйэ» түөлбэ олохтоохторо үөрэн-көтөн астынан, сүргэлэрэ көтөҕүллэн, истиҥ айар иэйиигэ куустардылар.

Устуудьуйа  хаһаайкаларыгар истиҥник махтанан тарҕастылар. «Күбэйэ» туойунан оҥоһуктары оҥорор арт-устуудьуйа атын түөлбэ олохтоохторун эмиэ сыл бэлиэтин бэлэхтэрин бэйэ илиинэн оҥостуҥ диэн ыҥырар”, — диэн сырдатта уопсастыбаннай түмсүүлэри кытта олохтоохтук үлэлиир Бэрдьигэстээх сэлиэнньэтин баһылыгын солбуйааччы Ксения Васильева.