Сыл чулуулара

Дьоруойдар кэккэлэрэ хаҥыыр

Быйыл Саха сирин уолаттара Игорь Юргин, Николай Соболев, Родимир Максимов, Дмитрий Куценко уонна Николай Евдокимов Арассыыйа Дьоруойун үрдүк аатын ыллылар.

Хаартыскалар: Социальнай ситимнэртэн.

Дыгын оонньууларын кыайыылааҕа — Дьулустаан Ноговицын!

Саха эр киһитин тулуурун, дьулуурун көрдөрбүт киһинэн Горнай улууһун Таас Боотура Дьулустаан Ноговицын буолар. Кини быйыл онус сылын Дыгын оонньууларыгар кыттан, уон сыл устата кыл мүччү иккис, үһүс буолар кыһыытын тулу­йан, муҥутуур кыайыылаах аатын ылла. Дьулустаан Ноговицын эһиилги Дыгын оонньууларыгар кыттарын туһунан эттэ.

Хаартыска: Андрей Сорокин, СИА.

Таалай күөл үрдүнэн

Куорат ортотугар сытар Таалай күөлү СӨ Судаарыстыбаннай цииркэтин артыыһа, СӨ култууратын туйгуна, хапсаҕайга успуорт маастара Владимир Степанов ханаатынан хааман туоруурун туһунан иһитиннэрэн, от ыйын 4 күнүгэр Дьокуускай куорат олохтоохторо хаһан да көрө илик шоуларыгар түмсүбүттэрэ.

Саатар ол күн тыаллаах этэ. Онон киһи үксэ Владимирга этэҥҥэ туораатар ханнык диэн ыалдьа турбуттара. Владимир ханаатын ортотугар тиийбитин кэннэ сэллии быһыытыйбыт тыал күүһүрэн, тардыллыбыт быаны хамсатан ылбыта. Ол эрээри идэлээх киһи бэрт эрэллээхтик уҥуоргу кытыл биэтэгэр тиийбитэ. Биһиги да кыахтаах дьонноох эбиппит диэн киэн туттубут дьон уруйдуу түспүттэрэ.

Хаартыска: СӨ Судаарыстыбаннай цииркэтин саайтыттан.

Саха киинэтин ахсым айана

Быйыл да саха киинэтин оҥорооччулар бэрт элбэх премьераны таһаардылар. Кинилэртэн ордук чорбойон Михаил Лукачевскай аата ааттанна. Режиссер быйыл икки киинэтэ: “Кыталыктаах кырдалым” уонна “Өрөгөй” араас бэстибээллэргэ ситиһиилээхтик кытынна. Казаньҥа буолбут “Союз” эрэгийиэннээҕи киинэ бэстибээлигэр Михаил Лукачевскай “Бастыҥ продюсер” анал аат кыайыылааҕынан буол­бута. “Кыталыктаах кырдалым” киинэ “Кыһыл көмүс суор” VIII Арктическай норуоттар икки ардыларынааҕы киинэ бэстибээл гран-притын ылбыта, Дьокуускайга буолбут  VII этническэй киинэ бэстибээлигэр бастыҥ оонньуулаах киинэнэн ааттаммыта. «Лiстапад» XXX Минскэйдээҕи норуоттар икки ардыларынааҕы киинэ бэстибээлигэр Беларусь Бэрэсидьиэнин уонна “Бастыҥ режиссура иһин” икки наҕарааданы туппута. КНР үс куоратыгар – Пекиҥҥэ, Нанкиҥҥа уонна Шэньчжэҥҥэ  ыытыллыбыт Арассыыйа киинэтин бэстибээлэ Михаил Лукачевскай “Кыталыктаах кырдалым” киинэтинэн аһыллыбыта.

Хаартыска: СИА.

Блогер буолуу сааскыттан тутулуга суох

Кырачаан блогер кыыс Айыына Кожурова туһунан истибэтэх киһи аҕы­йах буолуохтаах. Кини сахалыы тылынан устар видеоларын социальнай ситимнэргэ мөлүйүөнүнэн аан дойду дьоно көрөр. Айыына видеоларын нөҥүө дьон саха тыатын сирин олоҕун, айылҕатын көрөллөр,  кыысчаан оҕолуу аһаҕастык кэпсиирин сөбүлүүллэр. Интэриниэккэ кинини оҕо аймах амбассадора диэн ааттыыллар.

Айыына бу видеолара эспиэрдэр, но­­руот, дьүүллүүр сүбэ үс хос куоластааһынын ааһан, Арассыыйаҕа “Бастыҥ оҕо блогера” анал аат кыа­йыылааҕынан буолла.

Хаартыска: Социальнай ситимнэртэн.

Монголияҕа – атынан

Хас да сыллааҕыта Дугуйдан Винокуров саха атынан Москваҕа тиийбит буоллаҕына, быйыл күһүн Сунтаар Хаданыттан төрүттээх аҕам саастаах дьон Роман Попов уонна Геннадий Пустоляков атынан 2,5 ый устата айаннаан Монголияҕа тиийдилэр.

Геннадий Пусто­ляков кэпсииринэн, хайалар, үрэхтэр быыс­тарыгар тиийдэхтэринэ, аттарын сиэтэн сатыы бараллар эбит. Оттоох сир аҕыйаҕа моһуок буол­бут. Дьоно суох сиргэ үүтээҥҥэ, сиргэ хоно сылдьан айаннаабыттар. Икки ый устата маннык айаны чахчы тулуурдаах, эт-хаан өттүнэн бэлэмнээх дьон кыа­йаллара чахчы. Онон Роман Попов уонна Геннадий Пустоляков саха эр дьонун булгуруйбат майгыларын туоһута уонна кинилэри кытта тэҥҥэ сыспай сиэллээх сылгыларбыт номох буолбут айан биир дьоруойдарынан буолаллар.

Хаартыска: Андрей Оконешников.

Сыл бастыҥ спортсмена

Ааһан эрэр сыл бастыҥ спортсменынан көҥүл тустуу бэрэстэбиитэлэ Лев Павлов ааттанна. Быйылгы сыл киниэ­хэ элбэхтик мичик гыммыт, ол курдук Арассыыйаҕа, Дьобуруопаҕа бастыыр иһин киирсии­лэр кыайыылаахтара, аан дойду таһымнаах киир­сиигэ, Арассыыйа чөмпүйэнээтин финалиһа. Дмитрий Коркин уонна Роман Дмитриев норуоттар икки ардыларынааҕы турнирдарын кыһыл көмүс мэтээллэрин хаһаайына.

Хаартыска: Саргын Скрябин, СИА.

Кэрэ кыыс

Сыл аайы саамай кэрэ куону таларбыт үгэскэ кубулуйда. Быйылгы сыл саамай кэрэ кыыһынан Хаҥалас улууһуттан төрүттээх Айыына Пудова буолар. Айыына ХИФУ-га уйул­ҕа­һыт идэтигэр үөрэнэр.

“Мисс Рос­сия-2024” куонкурус­ка Саха сириттэн Айыына ыҥырыллан кыттыбыта, онлайн-куоластааһын түмүгүнэн дойду 20 саамай кыраһыабай кыргыттарын кэккэтигэр киирбитэ.

Хаартыска: Социальнай ситимнэртэн.