“Сыл дириэктэрэ-2023” куонкурус түмүктэннэ (хаартыска, видео)

“Сыл дириэктэрэ-2023” Бүтүн Арассыыйатааҕы куонкурус өрөспүүбүлүкэтээҕи түһүмэҕэ түмүктэннэ. Муҥутуур кыайыылааҕынан Мэҥэ Хаҥалас улууһун Аллараа Бэстээх 2-с нүөмэрдээх оскуолатын дириэктэрэ Ольга Колмакова таҕыста.

Тэрээһин үөрүүлээх сабыллыыта, долгутуулаах түгэн Оҕо айымньытын дьиэтигэр, “Саха сирин көдьүүстээх оскуолата” пуорум түмүгүн кытта бииргэ буолла. СӨ Үөрэҕин уонна билимин миниистирин бастакы солбуйааччы Алевтина Аргунова муҥутуур кыайыылааҕы биллэрээтин кытта, саала иһэ ытыс тыаһынан туолла. Салгыы муҥутуур кыайыылаах санаатын видеоҕа көрүҥ.

Москва куораттан “Покровскай квартал” оскуола дириэктэрэ, “Арассыыйатааҕы сыл дириэктэрэ-2022” куонкурус кыайыылааҕа, Саха сиринээҕи куонкурус эспиэрэ Павел Терехов:

— Бастатан туран, кыттааччылары сөпкө талбыттар. Иккиһинэн, ханнык баҕарар куонкурус судургута суох, төһө кыалларынан таһымнаахтык кыттар ирдэнэр. Саха Өрөспүүбүлүкэтигэр ити табылынна. Биэс бастыҥнар ахсааннарыгар киирбиттэр чахчы дьоһуннаах дьон. Онон тэрээһин соругун ситтэ. СӨ Үөрэҕи сайыннарар уонна идэ таһымын үрдэтэр институт тэрээһини үрдүк таһымнаахтык ыытта, — диэн санаатын үллэһиннэ.

Кыайыылааҕы, кыттааччылары саха эстрадатын чаҕылхай ырыаһыттарын сэргэ, Чурапчы улууһун эр дьон салайааччыларын хора эҕэрдэлээтэ.