«Сыл дириэктэрэ-2024» күрэс кыайыылааҕынан Светлана Шувалова таҕыста

Түөрт күн устата ыытыллыбыт, тыҥааһыннаах, долгутуулаах Бүтүн Арассыыйатааҕы “Сыл дириэктэрэ-2024” күрэс эрэгийиэннээҕи түһүмэҕэ түмүктэннэ. Муҥутуур кыайыылааҕынан Мииринэй куорат 7-с нүөмэрдээх оскуолатын дириэктэрэ Светлана Шувалова таҕыста.

“Үөрэҕи сайыннарар уонна идэ таһымын үрдэтэр үнүстүүккэ (дириэктэр Нь.М.Павлов) махталбын биллэрэбин. Эһиги күрэскит баар буолан, биһиги хамаандабытын салайбытынан, сиэппитинэн иннибит диэки хардыылыыбыт. Бу олус үчүгэй, хамаандабар махтанабын. Мин дьоллоохпун, өйөбүллэрин иһин дьиэ кэргэммэр, кэллиэгэлэрбэр, кэлэктииппэр махтанабын. Бу үс күн устата ааспыт тургутууларбыт биһигини уларытыаҕа уонна өссө биир үктэли өрө таһаарыаҕа”, — диэн муҥутуур кыайыылаахха — Светлана Анатольевнаҕа тыл биэрбиттэригэр санаатын үллэһиннэ.

Быйылгы күрэс сүрүн уратытынан дириэктэри сэргэ кини икки солбуйааччылара кытталлар. Кыайыылаах хамаандатыгар дириэктэри сэргэ иитэр, үөрэтэр үлэҕэ солбуйааччылара Оюна Цыреновна Санжиева, Оксана Николаевна Телешева кытыннылар. Кыайыылаах хамаандаҕа эҕэрдэ. Бүтүн Арассыыйатааҕы “Сыл дириэктэрэ” түмүктүүр түһүмэххэ Саха сирин аатыттан кыттыахтара.